Azərbaycan Memarlıq və İnşaat Universitetinin (AzMİU) Memarlıq fakültəsinin 3-cü kurs tələbəsi Leyla Mehdiyeva 3-6 dekabr tarixlərində Fransanın Marsel şəhərində Avropa Kosmos Həftəsində iştirak edib.

"Qafqazinfo" xəbər verir ki, Azərbaycan – Fransız Universitetinin (UFAZ) “TensorScience” komandasının tərkibində tədbirə qatılan Leyla burada “İnterconnectivity” panelində təqdim olunan layihənin dizayneridir.

“Geospinner” adlanan bu layihə ötən ilin mayında Azərbaycanda ilk dəfə keçirilən və UFAZ-ın ev sahibliyi etdiyi ActinSpase beynəlxalq müsabiqəsində nümayiş olunub və 2-ci yerə layiq görülüb.

5 gün davam edən konfransda dünyanın müxtəlif ölkələrindən 800-ə yaxın qonaq, 30-a yaxın spiker iştirak edib. Panelin rəsmi qonaqları və eyni zamanda spikerləri arasında Fransanın Ali Təhsil, Araşdırma və İnnovasiya naziri, Fransanın Kosmik tədqiqatlar Mərkəzinin prezidenti və Avropa Kosmik Agentliyinin baş direktoru olub. “TensorScience” komandasının üzvləri konfransda çıxış edən spikerlər arasında ən gənc iştirakçılar olublar. Azərbaycanı təmsil edən yeganə startap layihəsi olan “Arteve” konfrans iştirakçıları tərəfindən böyük maraqla qarşılanıb. Belə ki, “ARteve” paneldə prototip şəklində təqdim olunub.

Leyla qeyd edir ki, böyük investorların iştirak etdiyi bu tədbirdə layihələrinin gerçəkləşəcəyinə maliyyə yatırmaq istəyən iş adamlarının olacağına inanırlar. O, bundan sonrakı hədəflərinin layihənin mobil tətbiqetmə versiyasını yaratmaq olduğunu bildirib.