Mobil cihazlar üçün elektron imzanın tətbiqinə başlanılıb

mobil-cihazlar-ucun-elektron-imzanin-tetbiqine-baslanilib
Oxunma sayı: 630

Rabitə və İnformasiya Texnologiyaları Nazirliyinin Məlumat Hesablama Mərkəzində mobil cihazlardan istifadə edərək e-hökumət portalına sürətli, müasir və yüksək təhlükəsizliyə malik olan autentifikasiya sisteminin hazırlanması ilə əlaqədar təqdimat keçirilib. “Qafqazinfo”nun məlumatına görə, yaradılmış sistem istifadəçilərə iki faktorlu autentifikasiya sxemindən istifadə edərək, internet vasitəsilə smartfonlar, planşet kompüterlər kimi mobil cihazlarda xüsusi proqram vasitəsinin quraşdırılmasını, onunla rəqəmli sertifikatların yaradılmasını və sonra QR kodu skan edilərək e-hökumət portalına (istənilən informasiya portallarına inteqrasiya mümkündür) daxil olmağı təmin edir. Sistemin həyata keçirilməsi nazirliyin strategiyasının mühüm tərkib hissəsidir və əsas məqsəd istifadəçilərin “Elektron hökumət” portalından şəffaf, səmərəli və təhlükəsiz şəkildə istifadəsinə şərait yaratmaqdır. Təqdim olunan üsul dünyada e-hökumət resurslarına daxilolmanı təmin edən innovativ mobil autentifikasiya vasitələrindən biridir. Gələcəkdə sistem mobil cihazlardan hüquqi qüvvəli elektron imzalarla istifadəçilərin sənəd imzalamasına və onun aidiyyəti dövlət orqanlarına və ya istənilən digər ünvana göndərilməsinə imkan verəcək.
Rabitə və İnformasiya Texnologiyaları Nazirliyi İKT sahəsində bütün texnoloji yenilikləri və innovasiyaları öyrənərək vətəndaşlarımızın istifadəsinə təqdim və təşviq etmək istiqamətində işlərini davam etdirir.
Nigar