Kompüter informasiyasına qanunsuz olaraq daxil olmaqda, qanunsuz sahibkarlıqda və oğurluqda təqsirləndirilən 1980-ci il təvəllüdlü Rəhman Musayevin barəsindəki hökmdən apellyasiya şikayəti verilib.

“Qafqazinfo”nun verdiyi xəbərə görə, R.Musayev ləğv edilmiş Milli Təhlükəsizlik Nazirliyinin əməkdaşları tərəfindən saxlanılıb. MTN-in həmin vaxt yaydığı məlumatda bildirilirdi ki, Azərbaycan Respublikasının vətəndaşları – Musayev Rəhman Sahib oğlu, Abdullayev Elçin Tariyel oğlu, Zəkiyev Emin Tahir oğlu, Dadaşlı Mikayıl Elşad oğlu və qeyriləri mütəşəkkil dəstə tərkibində İnternetdən istifadə etməklə qanunla qorunan kompüter informasiyasına qanunsuz daxil olub onların surətlərini əldə edərək 2008-2011-ci illər ərzində həmin informasiyalar vasitəsilə ayrı-ayrı fiziki və hüquqi şəxslərə məxsus elektron bank hesablarından böyük məbləğdə pul çıxarıb və onların mənafeyinə külli miqdarda ziyan vurmaqla həmin pul vəsaitini gizli olaraq talayıblar.

Bakı Ağır Cinayətlər Məhkəməsinin hakimi İradə Həsənzadənin hökmü ilə R.Musayevə şərti cəza verilib və o, məhkəmə zalından azadlığa buraxılıb.

Lakin Rəhman Musayev bu qərarla da razılaşmayıb və apellyasiya şikayəti verərək ona bəraət verilməsini istəyib. Onun işi icraata qəbul edilib və ilkin baxış iclası iyunun 20-nə təyin edilib. Proses Bakı Apellyasiya Məhkəməsinin hakimi Əmir Bayramovun sədrliyi ilə davam etdiriləcək.

Murad Əhməd