“Qafqazinfo”nun xəbərinə görə, bəyanatda deyilir: “İlkin tədqiqatlar nəticəsində təsdiq olunan və əksər beynəlxalq təşkilatlar və dövlətlər tərəfindən birmənalı olaraq qəbul edilən informasiyaya görə təyyarə Rusiya tərəfindən dəstəklənən separatçı və terroristlərin nəzarəti altında olan ərazidən  yerdən atılmış “BUK” zenit – raket kompleksi ilə  vurulub.

Həmin raketlərin separatçı və terroristlərə Rusiya tərəfindən verilməsi  Ukrayna kəşfiyyat orqanları tərəfindən dəqiqləşdirilib və kimsədə şübhə doğurmur. 

Təyyarə vurulandan sonrakı dəqiqələr ərzində bu faciəni icra edənlərin  verdikləri raportlardan da təyyarənin məhz separatçı və terroristlər tərəfindən vurulması demək olar ki, dəqiqləşib. 

Hadisə nəticəsində həlak olanların içərisində körpə uşaqlarla yanaşı, elmi konfransa gedən dünyaca məşhur elm adamlarının da olduğu müəyyənləşib. 

Təyyarənin “qara qutu”su separatçı və terroristlərin nəzarətində olan Luqansk şəhərinə aparılıb,  sonra  Rusiya Federal  Təhlükəsizlik Xidmətinin əməkdaşlarına verilib. Bu faktın özü də cinayətin izinin Rusiya tərəfindən gizlədilməsinə xidmətə yönəlib. 

Yalnız ABŞ,  Avropa Birliyi və Malaziyanın  israrlı tələblərindən sonra təyyarə düşən yerin beynəlxalq qurumlar tərəfindən tədqiq olunmasına razılıq verilib. 

Müsavat Partiyası baş verən bu hadisəni planlı şəkildə  insanlığa qarşı yönəlmiş cinayət olduğunu bəyan edir, hadisənin  beynəlxalq qurumlar tərəfindən müstəqil şəkildə araşdırılmasını vacib hesab edir. Faciənin baş verməsinə şərait yaradanların,  bu işdə rolu olan şəxslərin və dövlətlərin tapılmasını və onların Beynəlxalq  Haaqa məhkəməsində insanlığa qarşı cinayət  maddələri ilə beynəlxalq hüquq normalarına əsaslanaraq cəzalandırılmasını tələb edir”.