Nizami Gəncəvi BM-in həmsədrləri və İdarə Heyətinin üzvləri bəyanat yayıblar

nizami-gencevi-bm-in-hemsedrleri-ve-idare-heyetinin-uzvleri-beyanat-yayiblar

Mədəniyyət

05.10.2020 | 16:27

Oxunma sayı: 1401

Nizami Gəncəvi Beynəlxalq Mərkəzinin həmsədrləri və İdarə Heyətinin üzvləri, Ermənistan silahlı qüvvələrinin Azərbaycanın işğal olunmuş əraziləri boyu uzanan cəbhə xəttində həyata keçirdiyi artilleriya hücumlarını qəti şəkildə qınayan bəyanat yayıblar.

“Qafqazinfo” xəbər verir ki, bəyanatda bildirilir:

“Səhər tezdən Azərbaycan ilə Ermənistan sərhədindən gələn toqquşma xəbərləri, dünyanın gündəmini dəyişdi. Bütün diqqəti BMT Baş Assambleyasının 75-ci il dönümünə yönəlmiş ölkələr bu xəbərdən şok oldular. BMT baş katibinin beynəlxalq hüquqla tənzimlənən çoxtərəfli dünya nizamına çağırışını təkrarladığı bir vaxtda Ermənistan silahlı qüvvələrinin Azərbaycan Respublikasının işğal olunmuş əraziləri boyu cəbhə xəttində həyata keçirdiyi artilleriya hücumlarını qəti şəkildə qınayırıq. 1994-cü ildə əldə olunmuş atəşkəs rejimi o vaxtdan bəri dəfələrlə pozulub, mülki şəxslər hədəfə alınıb. Dünya bir daha agah olsun ki, Ermənistan Respublikası, bu vaxta qədər işağalçı qüvvələrini zəbt etdiyi Azərbaycan torpaqlarından tam və qeyd-şərtsiz çıxarılmasını tələb edən BMT Təhlükəsizlik Şurasının 822, 853, 874 və 884 –cü qətnamələrini yerinə yetirməyib.

Nizami Gəncəvi Beynəlxalq Mərkəzinin həmsədrləri və İdarə Heyətinin üzvləri adından intensiv şəkildə beynəlxalq hüquq pozuntuları ilə qarşı-qarşıya qalan Azərbaycan xalqına həmrəyliyimizi ifadə edirik. Azərbaycan Respublikasının suverenliyinə və ərazi bütövlüyünə olan hüquqları beynəlxalq səviyyədə qəbul edilmiş, BMT və digər beynəlxalq qurumların qətnamələri ilə dəfələrlə dəstəklənmişdir. Sərhəd boyunca artmaqda olan son erməni təxribatları nəticəsində həyatını itirənlərin ailələrinə dərin rəğbətimizi çatdırırıq. Azərbaycanın ərazi bütövlüyünü bərpa etmək üçün göstərdiyi bütün səyləri dəstəkləyirik. Hər iki qonşu dövlətin - Azərbaycan və Ermənistanın prezidentlərini təmkinli olmağa və bütün Cənubi Qafqaz bölgəsinin sabitliyini və təhlükəsizliyini təhlükəyə ata biləcək münaqişənin böyüməsinə yol verməməyə çağırırıq. Beynəlxalq ictimaiyyəti, xüsusən də Avropa Təhlükəsizlik və Əməkdaşlıq Təşkilatını (ATƏT) hazırkı kəskin toqquşmaları aradan qaldırmaq üçün lazımi addımlar atmağa və uzunmüddətli Dağlıq Qarabağ və qanunsuz olaraq işğal edilmiş digər Azərbaycan əraziləri üzrə münaqişənin həlli üçün qanuni öhdəliklərini və mənəvi məsuliyyətlərini yerinə yetirməyə çağırırıq”.