Bu gün Azərbaycan Kubokunun ¼ final mərhələsinin cavab oyunlarına start verilib.

“Qafqazinfo” xəbər verir ki, “Qəbələ” doğma meydanda “Zirə”ni 4:1 hesabı ilə məğlub edərək (ilk oyunda 2:1 hesablı qələbə), növbəti mərhələyə adlayıb.

Qəbələ şəhər stadionundakı matçdan sonra təşkil olunan mətbuat konfransında açıqlama verən ev sahibi komandanın baş məşqçisi Roman Qriqorçuk qalibiyyəti belə şərh edib:

- Yəqin ki, hesabdan razısız...

- Əla hesab idi. Komanda bu cür qələbə qazananda sevinirəm.

- Asif ümumi ansambla qoşula bilib?

- Bu gün meydana çıxanlardan hamısı tam hazır futbolçulardı, həmçinin Asif də.

- "Zirə" çempionatda "Qəbələ"yə çətinlik yaratsa da, kubokda bu komandaya 7 qol vurduz. Bu komandada öyrənə bilmədiyiniz cəhət qalıb?

- Biz rəqiblərimizi maksimum analiz edirik. Bu rəqib haqda da hər şeyi öyrənmişik. Ancaq bu oyunu bir kənara qoymalıyıq. İndi ancaq bu komandaya qarşı çempionatdakı oyunu düşünürük.

- Bugünkü qələbə komandada arxayınlıq yarada bilər?

- Bu qələbə komandada eyforiya yaratmamalıdı. Bunun üçün müvafiq addımlar atacağıq.

- Kubokun finalının Gəncədə keçiriləcəyi deyilir. Sizcə, bu meydanda oynamaq uyğundu?

- Bu gün Gəncə stadionunun meydançası buna imkan vermir. Meydança qaydaya salınsa, əlbəttə keçirmək olar.

- Sizcə, çempionatda və kubokda ən güclü rəqibiniz hansıdı?

- Hər hansı komandanın adını çəkmək istəməzdim. Sadəcə, onu demək istəyirəm ki, deyilənlərin əksinə, Azərbaycan çempionatı heç də zəifləməyib. Düşünürəm ki, komandaların bir çoxunun səviyyəsi bərabərdi. Kim daha yaxşı hazırlaşırsa, o da qalib gəlir.

- Yarımfinalda kimi rəqib görmək istəyərdiz? "Xəzər Lənkəran", yoxsa "Neftçi"?

- Mənim üçün bunun heç bir fərqi yoxdu. Bu komandalardan hansı bizə rəqib olsa, deməli daha güclüdü.

- Adətən "Qəbələ"nin oyununu media nümayəndələri izləyəndə böyük hesabla qalib gəlir...

- Yox mən heç də futbolçulara media gəldikdə daha yaxşı oynayın təlimatı vermirəm. Belə statistika varsa, mən özüm media mənsubları üçün taksi göndərərəm.