Poroşenkonun məhkəməsi təxirə salındı - Yenilənib

Poroşenkonun məhkəməsi təxirə salındı
Oxunma sayı: 4208

Ukraynanın keçmiş Prezidenti Petro Poroşenko Polşanın paytaxtı Varşava şəhərində Frederik Şopen adına hava limanına gəlib və bir saatdan sonra Kiyevə uçacaq.

“Qafqazinfo” xəbər verir ki, bu barədə məlumatı hadisə yerindən “TASS” agentliyinin müxbiri məlumat verib.

Poroşenkonu aeroportda onlarla jurnalist gözləyib.

Suallara cavab verən Poroşenko Kiyevdə həbs olunacağından ehtiyat etmədiyini vurğulayıb: “Həqiqət mənimlədir. Ukrayna xalqı tərəfimdədir. Mən həbsə hazırlaşmıram”.

Qeyd edək ki, Poroşenko yanvarın 17-si Kiyevə uçacağını bəyan etmişdi. Bu gün Kiyev şəhərinin Peçerski Rayon Məhkəməsində keçmiş Prezidentin həbs olunması barədə vəsatətə baxılacaq. Məhz bu məhkəmə yanvarın 6-sı Poroşenkonun əmlakına həbs qoyub. O, dövlətə xəyanət də daxil olmaqla, bir neçə maddə üzrə ittiham olunur. 

Xatırladaq ki, Poroşenko 2014-cü ildən 2019-cu ilə qədər Ukraynanın Prezidenti olub.

***

Poroşenkonun da göyərtəsində olduğu “Wizz Air” aviaşirkətinin təyyarəsi Kiyev hava limanında yerə enib. Ölkənin eks-Prezidentinin 1000-ə yaxın tərəfdarı onu qarşılamaq üçün hava limanının qarşısına toplaşıb. 

***

Hazırda hüquq-mühafizə orqanlarının əməkdaşları Kiyev hava limanında Poroşenkonu saxlamağa çalışır. Millət vəkilləri isə onlara mane olmağa cəhd edirlər.

***

Poroşenko bildirib ki, sərhədçilər onun pasportunu götürüb və onu Ukraynaya buraxmaq istəmirlər. 

***

Poroşenko hava limanında pasport yoxlama məntəqəsindən keçməyə nail olub.

***

Poroşenko dövlətə xəyanətlə bağlı işinə baxılmalı olan Peçersk Rayon Məhkəməsinə gəlib. Məhkəmə binasında tərəfdarları qarşısında çıxış edən eks-Prezident məhkəmə iclasının “satqınlar tərəfindən təşkil edildiyini” deyib.

Poroşenko məhkəməyə həyat yoldaşı ilə gəlib. İclas başlayıb.

***

Poroşenko məhkəmədə ona qanunsuz olaraq dövlət vəkili təyin etməyə çalışdıqlarını, onun xidmətlərindən imtina etdiyini bildirərək hüquq-mühafizə orqanlarından bunun araşdırılmasını tələb edib.

***

Kiyevin Peçerski Rayon Məhkəməsi Ukraynanın eks-prezidenti Petro Poroşenkonun dövlətə xəyanət işi üzrə həbs qətimkan tədbirinin seçilməsi ilə bağlı vəsatətini prokurorluğa qaytarmaq xahişini rədd edib.

***

Kiyevin Peçerski Rayon Məhkəməsinin hakimi Ukraynanın eks-prezidenti Petro Poroşenkonun dövlətə xəyanət işi üzrə həbs-qətimkan tədbiri seçmək üçün müşavirə otağına gedib.

***

Hüquq-mühafizə orqanları bazar ertəsi eks-prezident Poroşenkonun həbs-qətimkan tədbirinin seçilməsi məsələsinə baxan Kiyevin Peçerski Rayon Məhkəməsinin binası yaxınlığında təhlükəsizlik tədbirlərini gücləndirib.

Hazırda proses müşavirə otağında davam edir. 

***

Poroşenko barəsində həbs-qətimkan tədbiri ilə bağlı məhkəmənin qərarı yanvarın 19-na qədər təxirə salınıb.