Avropa Konfrans Liqası qrup mərhələsinin 3-cü turu çərçivəsində “Qarabağ” Bakıda “Kayrat”ı məğlub edib.

“Qafqazinfo” xəbər verir ki, qarşılaşmadan sonra baş tutan mətbuat konfransında Qazaxıstan təmsilçisinin baş məşqçisi Kurban Berdıyev jurnalistlərin suallarını cavablandırıb:

- Matçla bağlı fikirləriniz necədir?

- İki fərqli hissə oldu. Birinci yarının nəticəsinə görə, hesabı qorumaq istədik. Amma "Qarabağ" öz oyununu göstərib nəticəni dəyişə bildi.

- Bu gün Bakıda futbol havası necə idi?

- Atmosfer yaxşı idi. Azarkeşler komandalarını yaxşı dəstəklədi.

- Sizi daha çox "Rubin"dən tanıyırıq. Oynatdığınız ultramüdafiə futbolu başadüşülən idi. Bəs bu gün "Qarabağ"a qarşı oynadılan oyunu necə başa düşək?

- "Qarabağ"ın hücum xətti güclüdür. Burada səhv etmək olmazdı. İlk yarıda öhdəsindən gəldik. İkinci hissədə "Qarabağ" layiqli qələbə qazandı. İkinci hissədə daha çox səhvlər başladı. "Qarabağ" da səhvlərdən istifadə etdi. Hesabı qorumağa çalışırdıq, amma "Qarabağ" üstün oldu.

- 90 dəqiqə standart vəziyyətlər zamanı texniki zonada otururdunuz. Bu ritual idi?

- Xeyr. Standart vəziyyətlərlə məşğul olan məşqçi göstəriş verirdi.

- "Kayrat"ın qrupdan çıxmaq şanslarını necə dəyərləndirirsiniz?

- Bugünkü oyundan sonra  şansımızı daha az qiymətləndirirəm. Amma şanslar qalıbsa, mübarizəni davam etdirəcəyik.