“Rayonlarda kredit faizləri Bakıdakından 2 dəfə çoxdur”

“Rayonlarda kredit faizləri Bakıdakından 2 dəfə çoxdur”
Oxunma sayı: 2024

İqtisadçı deputat Vüqar Bayramov bankların rayonlarda kreditləri yüksək faizlə verməsi məsələsindən danışıb. 

“Qafqazinfo”nun məlumatına görə, millət vəkili bildirib ki, rayonlara daha az vəsait ayıran banklar regionlarda kreditləri də yüksək faizlə təklif edirlər: “Mərkəzi Bankın məlumatına görə, bankların ən yüksək kredit faizləri Yuxarı Qarabağ iqtisadi rayonundadır. Yəni, Füzuli, Ağdam və Tərtər rayonlarında yaşayan vətəndaşlarımız və iş adamları daha yüksək faizli kredit götürmək məcburiyyətindədirlər. Bu iqtisadi rayon üzrə orta kredit faizi 24.25-dir.  

Uyğun olaraq, Dağlıq Şirvan və Aran iqtisadi rayonları da yüksək kredit faizlərinə görə fərqlənir. Ümumiyyətlə, rayonlarda kredit faizləri Bakı ilə müqayisədə orta hesabla 2 dəfədən çox artıqdır. 

Mərkəzi Bankın rayonlarda fəaliyyət göstərən sahibkarlara daha ucuz kreditlərin verilməsini təşviq etməsi çox vacibdir. Bu zaman xərclərin bir hissəsinin subsidiya edilməsi, rayonlara aşağı faizli kredit ayıran banklara əlavə güzəştlərin verilməsi mexanizmdən istifadə oluna bilər”.

Günel Türksoy