Sahibkarlıq subyektlərində monitorinqlər keçirilir

Sahibkarlıq subyektlərində monitorinqlər keçirilir
Oxunma sayı: 1167

İqtisadiyyat Nazirliyi fəaliyyətinə icazə verilmiş ticarət, xidmət və istehsal sahələrində Nazirlər Kabinetinin qərarları ilə müəyyən olunmuş xüsusi karantin qaydalarına, Nazirlər Kabineti yanında Operativ Qərargahın müəyyənləşdirdiyi zəruri sosial və sanitar-epidemioloji tələblərə əməl edilməsinə nəzarət məqsədilə mayın 22-dən başlayaraq monitorinqlər keçirilir.

"Qafqazinfo" ya daxil olan məlumata görə, bu məqsədlə Bakı şəhəri ilə yanaşı, iqtisadi rayonlar, həmçinin sənaye müəssisələri üzrə monitorinq qrupları yaradılıb. İndiyədək monitorinq keçirilmiş 16133 sahibkarlıq subyektinin 6778-də və ya 42 faizində nöqsanlar aşkar edilib.

Monitorinqlərdə Nazirliyin əməkdaşları sahibkarlarla maarifləndirmə işləri aparıb, xidmət personalının və istehlakçıların qoruyucu vasitələrdən istifadəsinin, fiziki məsafənin gözlənilməsinin, marketlərə istehlakçıların məhdudiyyətli girişinin, ticarət obyektinin dezinfeksiyaedici vasitələrlə təmin olunması zəruriliyini bir daha sahibkarların diqqətinə çatdırıblar. 

İyulun 4-dən başlayaraq isə nəzarət tədbirləri daha da gücləndirilib, sahibkarlıq subyektləri və onların vəzifəli şəxsləri tərəfindən epidemiya əleyhinə rejimin, sanitar-gigiyena və karantin rejimlərinin tələblərinə əməl edilməsi hallarının pozulması ilə bağlı yoxlama-nəzarət tədbirlərinə, nöqsan aşkar edilən obyektlər barədə qanunvericiliyə uyğun inzibati tədbirlərin görülməsi üçün protokolların tərtib olunmasına başlanıb. İndiyədək 4322 belə yoxlama keçirilib, bu obyektlərin 799-da və ya 18,5%-də epidemiya əleyhinə rejimin, sanitar-gigiyena tələblərinin pozulduğu müəyyən olunub və bu vergi ödəyiciləri barədə İnzibati Xətalar Məcəlləsinə əsasən protokollar tərtib edilib. 

Son günlərdə aparılan nəzarət tədbirləri göstərir ki, ticarət, xidmət və istehsal sahələrində xüsusi karantin qaydalarına əməl edilməsi artıq gündəlik tələbə çevrilir. Əgər monitorinqlərin başlandığı ilk günlərdə monitorinqlərin əhatə etdiyi obyektlərin böyük əksəriyyətində nöqsanlar aşkar edilirdisə, hazırda bu cür hallar əhəmiyyətli dərəcədə azalıb. Belə ki, iyulun 13-də Bakı şəhərində monitorinq keçirilmiş obyektlərin cəmi 9,9 faizində, digər şəhər və rayonlar üzrə isə 15,8 faizində nöqsanlar aşkar olunub. 

İqtisadiyyat Nazirliyi bir daha bildirir ki, sahibkarlıq subyektləri tərəfindən xüsusi karantin qaydalarına, habelə zəruri sosial davranış və sanitar-epidemioloji tələblərə tam riayət olunmalıdır.


Daha tez məlumatlanmaq üçün yeni Facebook səhifəmizi