“Qarabağ”la oyunda qələbə qolunu vuran “İnter”in təcrübəli müdafiəçisi Zurab Xizinaşvili qarşılaşmadan sonra jurnalistlərin suallarını cavablandırıb.

“Qafqazinfo” həmin müsahibəni təqdim edir:

- Oyunla bağlı fikrinizi bilmək maraqlı olardı...

- Çox çətin oyun oldu. “Qarabağ” Azərbaycanın ən yaxşı klublarından biridi. Onlarla oyuna xüsusi hazırlaşırıq, çünki güclü rəqiblə qarşılaşırıq. Bütün futbolçu, məşqçi heyətinin qələbədə payı var.

- 35 yaşında bu cür qol vurmağınız sizə xüsusi zövq verir?

- Yaşın əhəmiyyəti yoxdu, vacib olan qol vurmaq, komandanın qələbə qazanmasıdı. Kimin qol vurması da vacib deyil. Komanda şəklində mübarizə apardıq, 3 xalımızı qazandıq.

- “Qarabağ”ın cari mövsümdə yenə bilmədiyi yeganə komanda “İnter”di. Bunun sirri nədədi?

- Sirri qol vurmaqdı. Qol vurduq və qələbə qazandıq.

- AZAL-a və “Qarabağ”a qol vurmaq futbolçuya eyni hissləri yaşadır?

- “Qarabağ” da, “Qəbələ” də güclü komandalardı. Mənim üçün vacib olan qalib gəlməkdi. Bu “Kristal Pelas”la “Mançester Yunayted”ə vurulan qolların yaratdığı sevincin fərqinə bənzəyir.

- Klubla bağlı yaşanan son olaylar oyununuza nə dərəcədə təsir edir? Ola bilərmi, klubda sonuncu mövsümünüzü keçirəsiniz?

- Hazırkı olaylar bankdan qaynaqlanan texniki problemlərdi. Klubun idarəçiliyi AFFA-ya keçib. Yaya qədər klubla müqaviləm var. Sonra necə olacaq, deyə bilmərəm.