“Sosial qınaq olmalıdır ki, insanlar maskalardan istifadə etsin”

sosial-qinaq-olmalidir-ki-insanlar-maskalardan-istifade-etsin
Oxunma sayı: 824

Respublikanın baş infeksionisti Cəlal İsayev hazırda koronavirusun ölkəmizdəki vəziyyəti və yoluxmanın sayının azalması üçün atılmalı olan addımlardan danışıb.

“Qafqazinfo”nun verdiyi xəbərə görə, C.İsayev Real TV-yə açıqlamasında bildirib ki, dövlət bu günə kimi mümkün olan və zəruri olan bütün addımları atıb, indi növbə vətəndaşlardadır:

“Virus ölkəmizdə bitməyib, hələ qalır, hətta artmaqdadır: “Bunun da səbəbi insanların məsuliyyətsiz davranmasındadır. İnsanlar elə hesab edir ki, artıq karantin qaydalarında yumşalma varsa, deməli virus yoxdur. Vətəndaşlar sosial məsafəni qorumasa, tibbi maskadan istifadə etməsə xəstəlikdən xilas ola bilməyəcəyik. Xəstəlikdən qorunmaq deyəndə özümüzü nəzərdə tutmamalı, ətrafdakı insanları fikirləşməliyik. Vətəndaşlar tövsiyələrə əməl etməlidirlər ki, virusu yaymasınlar, bununla da təkcə özünü yox, ətrafını, ailəsini, yaxınlarını və bütün cəmiyyətini qorusun. Sən cavansan, sən yoluxanda bəlkə də sənə heç nə olmaz, amma sənin vasitənlə yaşlı insanlar, yanaşı xəstəliyi olanlar virusa yoluxa, ağır vəziyyətə düşə bilərlər. Sosial qınaq olmalıdır ki, insanlar tibbi maskalardan istifadə etsin. Maskalardan istifadə olunmasını vətəndaşlar özləri bir-birindən tələb etməlidirlər”.