“Maraqlı oyun keçdi. Bugünkü bərabərlik rəqibə cüzi üstünlük verə bilər. Səfər qolu üstünlüyü ləğv olunduğundan, artıq HİK bir topla öndə olmayacaq. Düşünürdük ki, böyükhesablı məğlubiyyət olmasa, xarakterimizi ortaya qoyub, ordan sərfəli nəticə ilə gəlməliyik. Qapıçımızın zədələnməsindən sonra meydanda ruh düşkünlüyünü aradan qaldırmaq istədik. Sağ olsun, Kamran bizi peşman etmədi, qapıda inamlı dayandı. Hər şey ikinci oyuna qalıb. Fərqli rəqibə qarşı çıxış edəcəyik".

"Qafqazinfo" xəbər verir ki, bunu “Neftçi”nin baş məşqçisi Samir Abasov Avropa Liqasının III təsnifat mərhələsində HİK-lə keçirilən ilk oyun barədə danışarkən deyib.

Samir Abasov daha sonra jurnalistlərin suallarını cavablandırıb:

- Emin Mahmudovun əvəzlənməsi yorulması ilə əlaqədar idi?

- Bəzi məqamları məşqə əsasən nəzərə alırıq. Futbolçuların fiziki durumu bu dəyişiklikləri etməyə əsas verir. Öz mövqeyinin oyunçuları hələ tam hazır deyildilər. Sistemin içində oyunçuları dəyişməli olduq. Kane çempionat matçlarında da müdafiənin sağ cinahında oynamışdı. Bu üzdən Eminə çox yük düşdü. Xəyal bəzi epizodlarda mövqeni bağlamaqda çətinlik çəkdi. Emin özü çox qaçan oyunçudur. Bugünkü duruma görə hamısı çox iş gördü.

- Aqil Məmmədovun durumu nə yerdədir?
- Onda birinci dəfə deyil ki, belə hal olur. Onunla yanaşı, Mirabdulla Abbasovun da səhhətində problem var idi. Bəzi oyunçular 3 gün məşq edə bilmirlər. Belə dəyişikliklər edəndə çoxları üçün müəmmalı qalır. Aqil "Olimpiakos"la matçdan əvvəl hərarət içində idi. Həm onun, həm də Eminin vəziyyəti o qədər də ürəkaçan deyil.

- Razı və narazı qaldığınız məqamlar nə oldu?
- Bütün oyundan razı qaldım. Narazı qaldığım heç nə yox idi.

- Sosial şəbəkələrdə Xəyal Nəcəfovu çox qınayırlar. Buna münasibətiniz necədir?

- Qınaqlara baxıb heyət qurmağımız düz olmaz. Sosial şəbəkədəkiləri oturtsaq, hərəsi bir heyət deyəcək. Kimi meydana buraxmaq baş məşqçinin edə biləcəyi yükdür. Xəyalı tanıyıram, onu çox istəyirik. "Neftçi" üçün böyük işlər görəcək. Sosial şəbəkədə məni də qınayanlar çoxdur. Bu, normal haldır.

- Rəqibin baş məşqçisi dedi ki, "Neftçi" gözlədiyimiz kimi oynadı. Cavab görüşündə gözlənilməz nə etməli olacaqsınız?

- Rəqib 24 futbolçu ilə bura gəlir. Bu da onlara hər cür rotasiya etmək imkanı verir. Biz isə əlimizdəki heyətdə sistemi dəyişə, oyunçuların yerini dəyişə bilərik. Bu üzdən bizi təhlil etmək çox asandır. Müdafiədə bəzi boşluqlar verdik. Öz oyunumuzu göstərdikdən sonra kimin bizi təhlil etməsi önəmli olmayacaq. Öz oyunumuzu tutmuşuqmu? Xeyr. Oyunumuzu artırdıqca kimlərin bizi analiz etməsi önəmli olmayacaq.

- Namik Ələskərovun son durumu necədir?
- Namik Türkiyəyə gedib. Üzünə qoyulacaq maska orada yoxlanılacaq. Ardından bura gələrək məşqlərə qoşulacaq.

- Sezar Meza Kolli və Mamadu Mbodju məcburiyyətdən heyətdə meydana buraxırsınız?
- Onlar oynamağa layiq futbolçulardır.

- Heyət kasadlığından şikayətlənirsiniz. Bunun səbəbi nədir?
- Buna da aydınlıq gələcək. Transferlə bağlı işlər gedir. Gec olsa da, axtarışdayıq. 3-4 danışdığımız hücumçu olub. Adamlar bura gəlmək, masa arxasına oturmaq istəmirlər. Bu, bizim klubdan qaynaqlanmır. Ümumi durumla bağlıdır. Geniş siyahıda oyunçu göstərilir. Səhərə qədər baxırıq, birinin üzərində dururuq. Bir həftə, 15 gün yalvarırsan, proses davam edir, menecerlərlə danışırsan. Fikirləşirik ki, bir neçə günə buradadırlar. Hətta bəzi oyunçularla özüm şəxsən danışmışam. "Gəlirəm" deyirlər, axırda gəlib çıxmırlar. Bəzi məqamlar var. Əlimizdə olan imkanlara görə addımlamaq məcburiyyətindəyik. Transferlər yüz faiz olacaq. Oyunçu çatışmayan mövqelərimiz var.