Fövqəladə Hallar Nazirliyinin Bakı Regional Mərkəzi Kiçik Həcmli Gəmilərə Nəzarət və Sularda Xilasetmə Xidməti ilə birlikdə “Su hövzələrində insanların təhlükəsizliyinin təmin edilməsi, mövcud problemlər və həlli yolları” mövzusunda müşavirə keçirib.

Qaradağ Rayon İcra Hakimiyyətindən "Qafqazinfo"ya verilən məlumata görə, müşavirədə Bakı Regional Mərkəzinin, Kiçik Həcmli Gəmilərə Nəzarət və Sularda Xilasetmə Xidməti, İcra Hakimiyyətinin, bələdiyyələrin nümayəndələri, çimərliklər, kənarlarında yerləşən ictimai iaşə obyektlərinin sahibləri, rayonun idarə, müəssisə və aidiyyəti təşkilatların rəhbərləri iştirak ediblər.

Müşavirəni giriş sözü ilə rayon İcra hakimiyyəti başçısının birinci müavini Emil Abbasov açaraq, xidmətin fəaliyyət istiqamətləri və yay çimərlik mövsümündə vətəndaşların təhlükəsizliyinin təmin olunması qaydalarının vacibliyini vurğulayıb.

Həmçinin şəhərin çimərlik mövsümünə hazırlıq vəziyyəti ilə əlaqədar məlumat verilib, eyni zamanda, FHN-in fəaliyyət istiqamətləri haqqında sənədli film və Kiçik Həcmli Gəmilərə Nəzarət və Sularda Xilasetmə Xidməti videoçarxı nümayiş etdirilib.

Bakı Regional Mərkəzinin rəis müavini general-mayor Kamil Bağırov tədbirə yekun vuraraq Qaradağ rayonu ərazisində yerləşən çimərliklərdə mövcud problemlər təhlil olunub, çimmək üçün qadağan edilən yerlərə aidiyyəti orqanların nəzarətinin gücləndirilməsi və həmin yerlərdə qadağanedici işarələrin yerləşdirilməsinin vacibliyi bildirib.