Tbilisidəki aksiyada 15 nəfər saxlanıldı - Yenilənib

Tbilisidəki aksiyada 15 nəfər saxlanıldı
Oxunma sayı: 1683

Gürcüstanın keçmiş Prezidenti Mixail Saakaşvilinin məhkəməsinin keçirilməli olduğu Tbilisi Şəhər Məhkəməsi yaxınlığında etiraz aksiyası keçirilir.

“Qafqazinfo” “Sputnik Gürcüstan”a istinadən xəbər verir ki, aksiya zamanı iştirakçılarla polis əməkdaşları arasında qarşıdurma yaşanıb.

Bir neçə iştirakçı mühafizə postunun üzərinə çıxıb. Bu zaman əllərində Gürcüstan, Ukrayna və ABŞ bayraqları tutan iki nəfər tikilinin damına çıxıb və aşağı enməkdən imtina edib. Onlar daha sonra tikilinin üstündən enəndə polislə qarşıdurma başlayıb.

“TV Pirveli” telekanalının məlumatına görə, polis aksiya iştirakçılarına qarşı bibər qazından istifadə edib.

Hazırda məhkəmə binasının qarşısında M.Saakaşvilinin yüzlərlə tərəfdaşı var. Daxili İşlər Nazirliyinin müxtəlif bölmələri təhlükəsizliyi təmin etmək üçün həmin əraziyə cəlb olunublar. Məhkəmə prosesinin başlaması isə gecikir.

***

Gürcüstan müxalifətinin liderlərindən biri Qiqi Uqulava Tbilisi Şəhər Məhkəməsinin önündə keçirilən aksiya zamanı saxlanılıb. 

***

Daxili İşlər Nazirliyinin məlumatına görə, aksiya zamanı 15 nəfər saxlanılıb.