“Qafqazinfo” “Tvente” klubunun qapıçısı Sonni Stevensin “apasport.az” saytına  verdiyi müsahibəni təqdim edir.

- Azərbaycan təmsilçisi ilə görüşlərdən nə gözləyirsiniz?

- Düzünü desəm, komandanız haqda geniş məlumatım yoxdu. Amma dəqiq bildiyim odu ki, çox maraqlı qarşılamalar olacaq. Həmin oyunlara qədər isə biz hələlik ölkə çempionatını düşünürük.

 - “Tvente” və “Qarabağ” 5 il öncə üz-üzə gəliblər. Həmin görüşlərdən də xəbəriniz yoxdu?

- Bu haqda mənə püşkatmadan sonra komanda yoldaşlarım danışdı. Amma həmin vaxt mən bu komandada olmamışam. Sadəcə, bu iki komandanın elə Avroliqada qarşılaşdığını eşitmişəm. Həmin oyun da səhv etmirəmsə, pley-off mərhələsində olub və mərhələni “Tvente” keçib. İnanıram ki, bu dəfə də belə olacaq.

 - Bu inam sizdə hardandı? Hər halda, “Qarabağ” da zəif komanda deyil, Avroliqaya Çempionlar Liqasından gəlib...

- Xəbərim var. Rəqibimiz Avstriyanın “Zalsburq” klubuna uduzublar. Amma cütün favoriti “Tvente”di.

 - “Qarabağ”ın “Zalsburq”la oyunlarını izləmisiniz?

- Qısaldılmış videosuna baxdım. “Qarabağ” yaxşı komandadı, “Zalsburq” kimi komandanı öz meydanında məğlub edib. Bildiyimə görə, Avstriyada müəyyən problemlər üzündən əsas futbolçulardan bir neçəsi iştirak etməyib. Ona görə də uduzublar.

 - Rəqibin heyətində tanıdığınız futbolçu var?

- Yalnız Reynaldo haqqında eşitmişəm. Amma onun barəsində də çox şey bilmirəm. Amma vaxt keçdikcə öyrənməyə çalışacağıq.  

 - “Tvente” cütün favoriti sayılsa da, komandanızın əvvəlki qədər yaxşı oynamadığını da söyləyənlər çoxdu...

- Fikrimcə, bütün bunlar yanlış fikirlərdi. Çünki Hollandiya çempionatının səviyyəsi hər kəsə bəllidi. Əgər biz burada III pillənin sahibi olmuşuqsa, deməli, özümüzə tam güvənə bilərik. İnanıram ki, bunu Avroliqada da sübut edəcəyik.