Xalq Bank 2021-ci ilin yekunlarını açıqladı

Xalq Bank 2021-ci ilin yekunlarını açıqladı
Oxunma sayı: 1646

ASC “Xalq” Bankı 2021-ci il ərzində əsas maliyyə göstəricilərində stabil mövqe  nümayiş etdirərək illik fəaliyyətini uğurla tamamlayıb.

Xalq Bank 2021-ci ilin yekununa əsas maliyyə göstəriciləri üzrə bazar mövqeyini qoruyub saxlayıb. Belə ki, ilin sonuna aktivlərin həcmi 2 339,39 mln manat, müştərilərə verilən kredit portfelinin həcmi 1 406,98 mln manat, banklar və digər maliyyə institutları istisna olmaqla depozitlərin həcmi 1 543,27 mln manat, cəmi kapital 449,18 mln manat təşkil edib. 2020-ci ilin sonu ilə müqayisədə xalis mənfəət 5,88% artaraq 27,29 mln manata çatdırılıb. Beləliklə, əsas maliyyə göstəricilərinin  həcminə görə Xalq Bank Azərbaycanın ən böyük özəl banklarının üçlüyündə olan yerini qoruyub saxlayıb.

2021-ci il ərzində Bank beynəlxalq və yerli təşkilatlar, eləcə də qlobal ödəniş sistemləri ilə əməkdaşlığı uğurla inkişaf etdirmişdir. Ötən il Bankın inkişaf strategiyasına uyğun olaraq məhsul və xidmət çeşidinin, bankomat və POS-terminal şəbəkəsinin genişləndirilməsi, nağdsız əməliyyatların həcminin artırılması və rəqəmsallaşma kimi istiqamətlərə xüsusi diqqət ayrılıb. Keçən  il istifadəyə verilmiş hüquqi və fiziki şəxslər üçün vahid platformalı XalqOnline mobil bankçılıq sistemi SME Banking Club beynəlxalq agentliyi tərəfindən “2021-ci ilin korporativ seqmentə xidmət göstərən ən yaxşı tətbiqi” mükafatına layiq görülüb.

2021-ci ildə Moody’s Investors Service beynəlxalq reytinq agentliyi Xalq Bankın yerli və xarici valyutada uzunmüddətli öhdəliklər reytinqini B2 səviyyəsində, reytinq üzrə proqnozunu isə “pozitiv” olaraq saxlamışdır. Agentlik Bankın kredit ödəmə qabiliyyətinin baza səviyyəsini (Baseline Credit Assessments) B3, yerli və xarici valyutada qısamüddətli və uzunmüddətli kontragent riski reytinqini (CR Assessments) B1 (cr)/Not Prime (cr) səviyyəsində təsdiq edib.

2021-ci ildə Bankın həyata keçirdiyi “Xalq Əmanəti” mədəni-sosial layihəsi çərçivəsində rəssam Şamo Abasovun bədii albomu geniş ictimaiyyətə təqdim olunub.

Ötən il fəaliyyətə başlamasının 17 illiyini qeyd edən Xalq Bank maliyyə-təsərrüfat fəaliyyətinin nəticələrinə görə ölkənin bank sektorunun liderləri arasında öz mövqelərini möhkəmləndirmişdir. Xalq Bank 2021-ci il ərzində məhsuldar əməkdaşlığa görə müştəri və tərəfdaşlarına minnətdarlığını bildirir. Qazanılan uğurlar, əldə edilən nailiyyətlər loyal müştərilərin və tərəfdaşların etimadı, peşəkar personal, düşünülmüş və effektiv idarəetmə siyasətinin sayəsində mümkün olub.