Xəstəxanadan Raulun ölümü ilə bağlı açıqlama - Yenilənib

Xəstəxanadan Raulun ölümü ilə bağlı açıqlama
Oxunma sayı: 3033

Xəbər verdiyimiz kimi, Topçubaşov adına Elmi Cərrahiyyə Mərkəzinin nəzdində Uşaq Ürək Cərrahiyyəsi Mərkəzinin rəhbəri Elnur Həsənov sentyabrın 15-də əməliyyat etdiyi 1 yaş 9 aylıq körpə Raulun ölümündə ittiham olunur. Bu barədə sosial şəbəkə hesabında yazan azyaşlının anası Nuranə Cəfərova iddia edir ki, həkimlərin çoxu risk səbəbindən əməliyyatdan imtina etsələr də, E. Həsənov uşağı əməliyyata götürüb. 

Daha öncə də işıqlandırdığımız şikayətlə əlaqədar M.A Topçubaşov adına Elmi Cərahiyyə Mərkəzindən “Qafqazinfo”nun sorğusuna cavab olaraq bildirilib ki, xəstə Cəfərli Raul Zaur oğlunun valideynləri 14.09.21 tarixində İcbari Tibbi Sığorta Agentliyinin göndərişi əsasında anadangəlmə ürək qüsuru və daun sindromu diaqnozu ilə mərkəzə müraciət ediblər: "Xəstədə aparılan exokardioqrafik müayinədə anadangəlmə ürək qüsuru, tam forma atrioventrikulyar kanal defekti, iki çıxışlı sağ mədəcik, ağciyər arteriyasının qapaq darlığı aşkar edilib. Həmçinin müraciət edərkən xəstənin ümumi vəziyyəti kritik ağır olub. Ümumi baxışda dəri və görünən selikli qişalar sionotik, pulsoksimetriyada saturasiya göstəricisi 80 faiz olub".

Açıqlamaya əsasən, xəstənin valideynindən anamnez toplandıqda məlum olub ki, anadangəlmə ürək qüsuru və daun sindromu bətndaxili ultrasəs müayinəsində aşkar edilib: "Buna görə hamiləlik 7 aylığında süni doğuşla sonlandırılıb. Bundan sonra uşaqda davamlı göyərmə tutmaları qeyd edilib. Bir neçə ay əvvəl isə uşağın vəziyyəti kəskin pisləşdiyindən valideynlər Respublika Klinik Xəstəxanasına müraciət ediblər. Xəstənin vəziyyəti kritik ağır olduğundan reanimasiya şöbəsinə yerləşdirilib. Xəstə Respublika Uşaq Xəstəxanasının reanimasiya şöbəsində mərkəzin cərrahı tərəfindən konsultasiya edilib və uyğun müalicə yazılıb. Xəstə valideyninə qüsurun mürəkkəbliyi və müalicəsinin yalnız mərhələli şəkildə icra edilə biləcəyi barədə geniş məlumat verilib. Respublika Uşaq Xəstəxanasında aparılan müalicə fonunda uşaq kritik ağır vəziyyətdən çıxıb və mərkəzimizə cərrahi müalicə üçün müraciət edib.  Xəstə mərkəzimizə qəbul olunduqdan sonra əməliyyat üçün lazım olan müayinələrdən keçirilib. Müayinələrin nəticələrində əməliyyata əks göstəriş olmadığından xəstə əməliyyata götürülüb. Stabil hemodinamika və arterial qan qazlarının normal göstəriciləri fonunda xəstə süni tənəffüs aparatından ayrılaraq ekstubasiya edilib”. 

Həmçinin oxuyun: “17 gündə 4 uşaq eyni həkimin əməliyyatında vəfat etdi”

Xəstəxanadan verilən açıqlamada həmçinin bildirilib ki, götürülən qan nümunələrində ciddi leykositoz və trombositopeniya, eyni zamanda yüksək hərarət qeyd edildiyindən antibiotiklər dəyişdirilib, sepsis əleyhinə müalicələrə başlanılıb. Buna baxmayaraq sentyabrın 26-dan etibarən xəstənin vəziyyəti geriləyib: “Qanda laktat dəyəri artdığından və təngnəfəslik inkişaf etdiyindən xəstə intubasiya olunaraq STA-ya qoşulub. Xəstədə diurez azaldığından peritoneal dializ yenidən başlanılıb. Aparılan müalicələrə baxmayaraq xəstədə tədricən hemodinamika pisləşib, eyni zamanda qarında ciddi köp inkişaf edib. Eyni zamanda trombosit sayında ciddi enmə baş verdiyindən endotraxel borudan və nazoqastral zonddan qanlı gəlim başlanıb. Aparılan müalicə tədbirlərinə baxmayaraq xəstədə poliorqan çatmamazlığı inkişaf etdi, asistoliya qeyd edilib. Aparılan reanimasyon tədbirlərə baxmayaraq ürək fəaliyyəti bərpa olunmayıb. Bioloji ölüm qeydə alınıb”.

Xatırladaq ki, Raulun anası Nuranə Cəfərova iddia edir ki, xəstəxanada baş verənlər haqda valideyn kimi ailəni məlumatlandırmayıblar: “Həkimin dediyinə görə əməliyyat uğurla başa çatıb. Bir gecə təhlükəsi var, əgər həmin gecəni atlatsa, hər şey əla olacaqdı. Lakin, gecə uşaq kiliniki ölüm keçirib və təcili təkrar əməliyyata alınıb. Bütün bu olanlardan biz səhəri gün xəbər tutduq, öz iradımızı bildirdik. Həkim hər şeyin yaxşı olduğunu qətiyyətlə bildirərək bizi sakitləşdirdi. Gündə bir dəfə - səhər 08:00-da bir dəqiqə uşağı görmək imkanımız vardı, Raul suni nəfəs aparatında idi. Dedikləri bu idi ki, göstəricilər normaldır, yaxşılaşdırmaq üçün süni nəfəs aparatına bağlamışıq. Günlər beləcə davam elədi, uşaq reanimasiyada yatılı halda orta ağır vəziyyətdə yaşamla mübarizə aparırdı. Artıq 2 həftə tamamlandı. Raul həmin iki həftədə üç gün gözü açıq oldu (süni nəfəs aparatından ayırmışdılar) və heç bir reaksiya vermirdi, halbuki, çox aktiv uşaq idi”. 

N. Cəfərovanın sözlərinə görə, əməliyyatın 14-cü günü övladının palataya köçürüləcəyini bildirib. Lakin məlum olub ki, uşağın vəziyyəti pisləşib, təkrar suni nəfəs aparatına bağlanıb, səbəb olaraq ağ ciyərinə su yığıldığı deyilib. Yalnız 17-ci gün səhər saatlarında şöbədə işləyən digər həkim onlara uşağın can verdiyini, göstəricilərin aşağı düşdüyünü, bir neçə saata öləcəyini söyləyib. 

Ana bildirib ki, Raulun ciyərləri xəstə deyildi, körpənin ölüm səbəbi müəmmalıdır. Həmçinin N. Cəfərova xəstəxanada olduqları 17 gündə 4 uşağın eyni həkimin əməliyyatında vəfat etdiyini qeyd edib.  N. Cəfərova əlavə edib ki, övladının əməliyyatı sığorta ilə olunmalı olsa da, həkim ailədən əməliyyata görə pul alıb. 

Xatırladaq ki, Uşaq Ürək Cərrahiyyəsi Mərkəzinin rəhbəri Elnur Həsənov həmçinin əməliyyat etdiyi bir yaşlı Səyyad Bayramovun valideynləri tərəfindən də onun ölümündə ittiham olunur.

***

Raul Cəfərlinin nənəsi Gülnaz Əkbərova redaksiyamızla əlaqə saxlayaraq xəstəxananın ittihamlarını təkzib edib. Uşağı özünün saxladığını deyən G. Əkbərovanın sözlərinə görə, o, əməliyyatdan əvvəl özünü çox yaxşı hiss edib, danışıb-gülüb: “Uşaq ana bətnində sarılıq keçirib, nəfəs ala bilmirdi. Ona görə həkimlər məsləhət gördülər ki, 7 aylıq doğulsun. Biz onu Elmi-Tədqiqat Pediatriya İnstutuna yerləşdirmişik və güvəcdə qalıb. Biz uşaqdan imtina etməmişik. Uşaq tam daun sindromlu olmayıb və bu sindrom səbəbindən erkən doğum edilməyib. Bu deyilənlər yalandır. Uşağın əməliyyatdan bir gün qabaqkı videoları var. O, ölümcül vəziyyətdə deyildi, əməliyyata getdiyi gün danışırdı, “nənə”, “ana” deyirdi. Bəli, 7 aylıq doğulub, ona görə ki, ürək qüsurlu idi və sarılıq keçirmişdi”.

Azyaşlının nənəsi həkimin onları aldatdığını, ölüm xəbərini gec verdiyini deyib: “Uşağımı xəstəxanada elə vəziyyətə salmışdılar ki... Həkim bizə dedi ki, uşaq əməliyyatdan sonra əladır. O yeriyəcək, gətirib şirinlik verəcəksən. Yalandan deyib ki, müalicə edirəm, uşaq sağdır, halbuki axşamdan keçinibmiş. O bizdən pul alıb əməliyyat edib. Deyib ki, sığorta sayıram. 

Anası Nuranə Cəfərova isə bildirib ki, ailəyə uşağın sağ olduğunu deyib ümidləndiriblər: “Mənə dedilər ki, uşaq sağalıb. Biz gedib ona nə qədər paltar aldıq. Gedib gördük ki, uşaq ölüb... Uşağın vəziyyəti pisdirsə, bunu mənə yavaş-yavaş izah elə də. Məni niyə ümidləndirirsən ki?!”

Gülnar Əliyeva