- Sosial sifariş deyəndə nəyi nəzərdə tutursunuz?

- Azərbaycanda baş verən ictimai-siyasi, sosial-psixoloji hadisələr göstərir ki, ziyalı sözünə heç vaxt bugünkü qədər ehtiyac olmayıb. Ziyalı məsləhətini, ziyalı sözünü, ziyalı yolgöstərməsini nəzərdə tuturam. Elə adamlarla görüşəndə də ziyalı sözünə çox önəm verdikləri açıq-aşkar görünür.

- Qurumun tətrkibində hər hansı dəyişiklik olacaq?

- Əslində, Ziyalılar Forumu açıq qurumdur. Yəqin köhnə tərkibdə fəaliyyətimizə davam edəcəyik, amma yeni şəxslərin də qoşulmasını gözləyirik.

- Qurumun yeni koordinatoru kim olacaq? Ziyalılar Forumu son vaxtlar yazıçı, kinossenarist Rüstəm İbrahimbəyovun evində toplaşırdı…

- Obyektiv və subyektiv səbəblər üzündən Rüstəm müəllimin Ziyalılar Forumunda iştirakı əngəllənib. Ramiz Rövşən, Rafiq Əliyev, Gültəkin Hacıbəyli, Cəmil Həsənli və başqalarıyla birgə fəaliyyətimizi davam etdirəcəyik. Qurumun koordinatoru Rafiq Əliyev olacaq.

- Qurumun fəaliyyətinin bərpası sizin fikrinizdir, yoxsa məsləhətləşmələrin nəticəsi?

- Məsləhətləşmələr hər zaman olur. Forumun fəaliyyətinin bərpası yekdil fikrimizdir.

- Fəaliyyət proqramınızla bağlı nə deyə bilərsiniz?

- Ölkədə kifayət qədər problemlər var və bu problemlərin həllində, çıxış yollarını tapmaqda ziyalılar önəmli rol oynaya bilər. Biz ilk toplantımızı keçirək, ondan sonra planlarımızla bağlı daha konkret danışarıq.