30 yaşlı britaniyalı Corc Lainq İtaliyanın Siciliya bölgəsində yerləşən Mussomeli şəhərində həyata keçirilən “1 avroya ev” proqramı çərçivəsində bir əmlak alıb.

“Qafqazinfo” xəbər verir ki, o, bu təcrübənin real xərcləri barədə danışıb.

İtaliyada tərk edilmiş kəndlərin dirçəldilməsi və boş qalan evlərin bərpası məqsədilə başladılan “ucuz ev” layihələri son illərdə böyük maraq doğurub. 2019-cu ildən etibarən Siciliyada bəzi evlərin 1 avroya satışa çıxarılması diqqət çəkib və bu model bir çox bölgələrdə ya uğurla davam etdirilir, ya da tələbatla qarşılanır.

Britaniyalı Lainq isə bu proqramla tanış olduqdan sonra İtaliyaya köçmək qərarı verib. O bildirib ki, bu addımın əsas səbəbi Londondakı yüksək kirayə qiymətləri və mənzil almağın çətinliyi olub.

“Mən Londonda yaşayırdım və maaşımın 30 faizindən çoxu kirayəyə gedirdi. Daşınmaz əmlaka investisiya etmək istəyəndə depozit yığmaq imkanım yox idi. Ev almaq istəsəydim, kredit balım da ipoteka üçün kifayət etmirdi”, – o deyib.

Lainq əlavə edib ki, o dövrdə hesabında təxminən 5000 avro olub və İtaliya ilə xüsusi bir bağlılığı da olmayıb: “Siciliya ilə hər hansı əlaqəm yoxdur. 14 yaşımda məktəb səfərində olmuşdum, amma demək olar ki, heç nə xatırlamıram”.

Onun sözlərinə görə, qərar verməsində əsas səbəb real olaraq ucuz qiymətə ev sahibi olmaq imkanı olub: “Sadəcə öz evimə sahib olmaq istəyirdim. Dünyada bunu bir neçə min avroya edə biləcəyin çox az yer var”.

Lainq bildirib ki, İtaliyadakı “1 avroluq ev” sistemi ilk baxışda çox cəlbedici görünsə də, real xərclər sonradan ortaya çıxır. Onun sözlərinə görə, evlər əvvəlcədən göstərilmir və seçim yerində edilir: “Əvvəlcədən heç bir evin şəklini görmürsən. Həmin gün şəhərdə bizi gəzdirib evləri göstərirlər”.

Britaniyalı seçdiyi evin nisbətən yaxşı vəziyyətdə olduğunu deyib: “Dam çökmürdü və kifayət qədər möhkəm görünürdü”.

O qeyd edib ki, bu cür evlərdə əsas məsələ yalnız alış qiyməti deyil, sonrakı xərclərdir.

Lainq hazırda evi təmir etdiyini və bu prosesin gözlədiyindən çətin olduğunu da vurğulayıb.

O, seçdiyi evin 11 nömrəli olduğunu, bunun da onun şanslı rəqəmi sayıldığını qeyd edib.

Lainqin sözlərinə görə, bu tip layihələrdə seçim imkanı məhdud olur: “Əgər bir ev üçün ümumilikdə təxminən 5000 avro ödəyirsinizsə, (notariat xərcləri daxil olmaqla), çox seçici ola bilməzsiniz”.

Britaniyalı əlavə edib ki, evləri nəzərdən keçirərkən artıq əvvəlcədən bir neçə əmlak alan alıcılarla da qarşılaşıb: “Əvvəllər üç ev almış və daha bir neçəsini almağa hazırlaşan bir amerikalı ilə birlikdə baxırdıq. Mən onu kənara çəkdim və sadəcə ondan bunu almağa icazə verməsini istədim. Bir az şirin söhbət lazım oldu”.

O vurğulayıb ki, belə proqramlarda tələb yüksəkdir: “Sonsuz sayda ev yoxdur və bələdiyyələr bu barədə minlərlə e-poçt alır”.

Proqram şərtlərinə əsasən, Corc evi aldıqdan sonra üç il ərzində onu sata bilməz, lakin bu müddət bitdikdən sonra əmlak üzərində sərbəst sərəncam verə bilər.

Agentlik və hüquqi xərclər ödənildikdən, eləcə də, enerji sertifikatı alındıqdan sonra Lainq Mussomelidə evi təxminən 5000 avroya əldə etdiyini bildirib.

“Bu pula Londonda hətta kiçik bir kottec belə almaq mümkün deyil”, – deyə o qeyd edib və əlavə edib: “Əvvəllər kirayəyə ayda 1000 avrodan çox ödəyirdim. Bu ev mənə cəmi beş aylıq kirayə qiymətinə başa gəldi”.

Lainq bildirib ki, proqram çərçivəsində ondan evin damını və fasadını müəyyən müddət ərzində təmir etməsi tələb olunur: “Əgər bunu etməsəniz, 5000 avro cərimə tətbiq oluna bilər, amma pandemiya dövründən sonra bələdiyyələr bu məsələdə daha yumşaq davranır”.

O, hazırda evin təmiri ilə məşğul olduğunu və işlərin çətin olduğunu da etiraf edib: “Mərmər pilləkənlər, orijinal detallar var, amma eyni zamanda ciddi çatlar və dağılmış hissələr də mövcuddur”.

Corc əlavə edib ki, ev çox köhnə olsa da, onun uzun illərdir dayanması inam yaradır: “Ev 200-300 ildir ki, uçmayıb, ona görə də tezliklə də uçacağını düşünmürəm”.

O qeyd edib ki, ən maraqlı məqamlardan biri evin əvvəlki sahibinin çoxlu əşyaları olduğu kimi tərk etməsidir.

Hazırda o, təmir işlərini özü görür və vanna otağını təkbaşına qurmağa çalışır: “Bunu əvvəllər heç vaxt etməmişəm. “YouTube” mənə çox kömək edir”.

Lainq bildirib ki, su və elektrik hələ qoşulmayıb, buna görə də bəzən evdə qala bilmir: “İki gün evdə qalıram, sonra duş üçün çarəsiz qalanda yaxınlıqdakı hotelə gedirəm”.

O əlavə edib ki, təmir zamanı, əsasən, əl alətlərindən istifadə edir və elektrik alətlərinə qayıtmağı səbirsizliklə gözləyir.

Hazırda Lainq ümumilikdə xərcləri minimuma endirməyə çalışdığını bildirir və əlavə edib ki, indiyədək təxminən 300 avro materiallara xərcləyib.

“Bütün bunları məhdud büdcə ilə edirəm”, - deyə o bildirib.

Onun sözlərinə görə, indiyədək ən böyük xərci təxminən 1500 avro təşkil edən səyahət və hotel xərcləridir. O əlavə edib ki, evin tam təmiri – iki yeni vanna otağı və mətbəxin quraşdırılması, həmçinin zirzəminin ayrıca mənzilə çevrilməsi daxil olmaqla – ümumi xərcin 15 min avrodan aşağı olacağını düşünür.

Lainq həmçinin gələcək planlarını bölüşüb: o, artıq həmin bölgədə daha bir əmlak almaq niyyətindədir və 35 yaşına qədər İtaliyada 10 əmlaka sahib olmağı hədəfləyir.

“Maraqlanan hər kəsi bu səyahətə başlamağa təşviq edirəm”, – deyə o bildirib.

“İnsanlar bəzən daşınmaz əmlak pilləkəninə qalxmaq üçün yüz minlərlə pula ehtiyac olduğunu düşünürlər, amma burada bu belə deyil”.

“Hazırkı vəziyyətdə ilişib qalmaq məcburi deyil. Bu evi təmir etdikdən sonra Londonda mənzil almaq şansım daha da artacaq. Sadəcə risk etmək lazımdır”, - o bildirib.