Təqaüd Proqramı ilə Avstraliyanın Melburn Universitetində magistr təhsil alan azərbaycanlı rejissor Afaq Yusifli təhsilinin maliyyələşdirilməsi ilə bağlı yaranmış problem səbəbindən təhsilini itirmək təhlükəsi ilə üzləşib.

“Qafqazinfo” xəbər verir ki, bu barədə A.Yusifli özü sosial şəbəkə hesabında paylaşım edib. 

Belə ki, 2026-cı ilin fevralından Avstraliyanın Melburn Universitetində Bədii və Sənədli Filmlər üzrə Prodüserlik magistr proqramında təhsil alan azərbaycanlı tələbə təhsilhaqqının bir hissəsinin vaxtında ödənilməməsi səbəbindən universitetdən sonuncu xəbərdarlıq alıb.

Onun sözlərinə görə təhsilhaqqının maliyyələşdirilməsi iki istiqamət üzrə həyata keçirilir. Mədəniyyət Nazirliyinin Mədəni və Yaradıcı Sənayelər üzrə xüsusi təqaüd proqramı çərçivəsində təhsilhaqqının 50 faizi qarşılanır. Birinci semestr üzrə 19 485 ABŞ dolları, üçüncü semestr üzrə isə digər dövlət qurumu tərəfindən 15 000 ABŞ dolları məbləğində ödəniş artıq universitetə köçürülüb. Mövcud ödəniş qrafikinə əsasən, növbəti ödənişin 2027-ci ilin I rübündə həyata keçirilməsi nəzərdə tutulur.

Problem isə Azərbaycan Kinematoqrafçılar İttifaqı vasitəsilə universitetə ödənilməli olan 25 500 AZN-in köçürülməməsi səbəbindən yaranıb.

Tələbənin bildirdiyinə görə, həmin vəsait 2025-ci ilin dekabrından etibarən onun təhsilhaqqının ödənilməsi üçün ayrılıb. Lakin 2026-cı ilin martında Azərbaycan Kinematoqrafçılar İttifaqının sədri Rasim Balayevin vəfatından sonra ödəniş prosesi dayanıb. Səbəb kimi ödəniş sənədlərini imzalamaq səlahiyyətinə malik şəxsin vəfat etməsi və sonrakı inzibati proseslər göstərilir.

A.Yusifli bildirib ki, vəsait hazırda İttifaqda mövcuddur və onun universitetə köçürülməsi üçün müxtəlif variantlar müzakirə olunub. Vəsaitin tələbənin şəxsi hesabına köçürülərək universitetə ödənilməsi variantında isə universitet tərəfindən hüquqi məsələlər yarandığı bildirilir. Çünki tələbənin Avstraliya vizası üçün təqdim etdiyi sənədlərdə təhsilhaqqının müvafiq qurumlar tərəfindən ödəniləcəyi göstərilib.

Onun sözlərinə görə, Melburn Universitetindən artıq dördüncü xəbərdarlıq daxil olub. Universitet tərəfindən bildirilib ki, oktyabr ayının ilk həftəsinə qədər ikinci semestr üzrə ödəniş həyata keçirilməsə, onun təhsili ilə bağlı sanksiya tətbiq oluna bilər.

Məsələ ilə bağlı Azərbaycan Kinematoqrafçılar İttifaqından (AKİ) sorğumuza cavab olaraq bildirilib ki, Afaq Yusiflinin təhsilhaqqının ödənilməməsi ilə bağlı məsələ sırf texniki xarakter daşıyır və müvəqqətidir:

“Problem AKİ-nin sədrliyinə sentyabrın 11-də keçiriləcək seçki konfransından sonra həllini tapacaq. Onu da qeyd edək ki, AKİ həmişə gənc kinematoqrafçılara dəstək olub, bundan sonra da onların inkişafına dəstək xətti davam edəcək. Ona görə  sosial mediada Afaq Yusifliyə AKİ-nin dəstək olmayacağı məsələsi ilə bağlı yayılmış fikirlər əsassızdır”. 

***

Məsələ ilə bağlı  ARKA-dan verilən məlumatda bildirilib ki, Melburn Universitetində Bədii və Sənədli Filmlər üzrə Prodüserlik magistr proqramında təhsil alan azərbaycanlı tələbə Afaq Yusiflinin təhsil haqqının ödənilməsilə bağlı yaranmış problem Mədəniyyət Nazirliyinin və onun tabeliyində fəaliyyət göstərən Kino Agentliyinin nəzarətinə götürülüb:

Məlumatda qeyd olunub ki, Afaq Yusiflinin təhsil haqqı qismən Mədəniyyət Nazirliyinin Mədəni və Yaradıcı Sənayelər üzrə xüsusi təqaüd proqramı çərçivəsində ödənilirdi. Nazirlik bu istiqamətdə öz üzərinə düşən öhdəliyi tam şəkildə yerinə yetirmişdir. Buna baxmayaraq, digər tərəf vəsaiti vaxtında köçürmədiyinə görə təhsil haqqının ödənilməsində problem yaranıb.

Artıq Mədəniyyət Nazirliyinin və onun tabeliyində fəaliyyət göstərən Kino Agentliyinin tərəfindən vəsaitin qalan hissəsinin də ödənilməsi üçün lazım olan addımların atılmasına başlanlıb. Məsələ ən qısa zamanda tam həllini tapacaqdır.

Lamiyə Məmmədova