İspaniyanın Burqos əyalətində yerləşən, illərdir yaşayış olmayan Villalibado kəndi nadir astronomik hadisə ilə yenidən gündəmə gələcək.

“Qafqazinfo” xəbər verir ki, kənd avqustun 12-də baş verəcək tam Günəş tutulmasının NASA tərəfindən canlı yayımlanacağı xüsusi müşahidə məntəqələrindən biri olacaq.

Onilliklərdir tərki edilmiş Villalibado bu hadisə sayəsində beynəlxalq auditoriyanın diqqət mərkəzinə düşəcək. Tutulma NASA-nın rəqəmsal platformaları və San-Fransiskodakı “Exploratorium” vasitəsilə dünyanın müxtəlif ölkələrindəki izləyicilərə canlı təqdim ediləcək.

Villalibadonun seçilməsində onun tam tutulma zolağında yerləşməsi, üfüqün maneəsiz görünməsi və rabitə infrastrukturunun əlverişli olması əsas amillərdən olub.

Müşahidə məntəqəsinin kəndin yuxarı hissəsində, San Salvador kilsəsinin yaxınlığında qurulması planlaşdırılır. Beynəlxalq yayım üçün burada NASA və “Exploratorium”un təxminən 30 əməkdaşının çalışacağı bildirilir.

Tədbirin təşkilatçıları üçün kəndin fiber-optik internet bağlantısının olması da mühüm üstünlükdür.

Təxminən 20 il əvvəl Villalibadonu satın alan və ərazini kənd turizm kompleksinə çevirən iş adamı Xuan Ansotegi “Diario de Burgos”a bildirib ki, NASA aylar əvvəl onunla əlaqə saxlayıb.

Onun sözlərinə görə, NASA tutulma zamanı bütün kəndi, o cümlədən tarixi Romanesk kilsəsini icarəyə götürməkdə maraqlı olduğunu bildirib.

Ansotegi isə ilk telefon danışığında bu təklifin həqiqi olduğuna inanmayıb və zəngin fırıldaq olduğunu düşünüb.

“Əlbəttə, onlar öz elektrik və internet bağlantılarını istədilər. Lakin kəndimizdə artıq fiber-optik bağlantı olduğuna görə heç bir problem yaranmadı”, – deyə o bildirib.

Villalibado təxminən 30 il ərzində yaşayışsız qalıb. Kəndin son iki sakini 1998-ci ildə buranı tərk edib.

İllər sonra Ansotegi və qardaşları kəndi turizm məkanına çevirmək üçün burada bərpa işlərinə başlayıblar. İndi isə bir vaxtlar tamamilə boş qalan Villalibado milyonlarla insanın izləyəcəyi astronomik hadisənin müşahidə nöqtələrindən birinə çevrilir.

Avqustun 12-dəki tam Günəş tutulması Qrenlandiya, İslandiya, Atlantik okeanı, İspaniyanın şimalı, Portuqaliyanın bir hissəsi və Rusiyanın şimalı üzərindən keçəcək.

Avropanın digər bölgələrində və Şimal yarımkürəsinin geniş hissəsində isə tutulmanı qismən müşahidə etmək mümkün olacaq.

NASA tam tutulmanı tutulma zolağı boyunca müxtəlif məntəqələrdən canlı yayımlayacaq.

İllər əvvəl tərk edilmiş Villalibado kəndi bir neçə saatlıq astronomik hadisə zamanı dünyanın diqqət mərkəzinə çevriləcək.