Daşkəsəndə 20 Yanvar – Ümumxalq Hüzn Günü ehtiramla qeyd olunub.

“Qafqazinfo” xəbər verir ki, Daşkəsən Şəhidlər xiyabanında təşkil olunan anım mərasimdə Daşkəsən Rayon İcra Hakimiyyətinin başçısı Orxan Abbasov, rayonun hüquq-mühafizə orqanlarının rəhbərləri, hərbçilər, idarə, müəssisə və təşkilatların kollektivləri, şəhid ailələrinin üzvləri, müharibə iştirakçıları, ictimaiyyət nümayəndələri və sakinlər iştirak ediblər.

Daşkəsən Rayon İcra Hakimiyyətinin başçısı Orxan Abbasovun adından Şəhidlər xiyabanındakı “Əbədi məşəl” abidəsinin önünə əklil qoyulub, 20 Yanvar faciəsi qurbanları və bütün şəhidlərimiz anılıb, Birinci və İkinci Qarabağ müharibələri zamanı torpaqlarımızın azadlığı uğrunda şəhid olmuş daşkəsənlilərin məzarları üzərinə qərənfillər düzülüb.

İcra başçısı Orxan Abbasov vurğulayıb ki, bu gün şəhidlərimizin ruhu şaddır, çünki onların qanı hədər getməyib. 36 il əvvəl başlayan çətin, məşəqqətli və şərəfli yol xalqımızı 1991-ci il oktyabrın 18-də yenidən dövlət müstəqilliyinə qovuşdurdu. Prezident, Müzəffər Ali Baş Komandan İlham Əliyevin rəhbərliyi ilə 2020-ci ildə 44 günlük Vətən müharibəsində qazanılan möhtəşəm Zəfər, eləcə də 2023-cü ilin sentyabrında həyata keçirilən uğurlu antiterror əməliyyatları nəticəsində ərazi bütövlüyümüz və suverenliyimiz tam bərpa olunub. Hazırda Azərbaycanın Dövlət Bayrağı ölkəmizin hər bir güşəsində qürurla dalğalanır. Xalqımız 20 Yanvar faciəsinin 36-cı ildönümünü indi xüsusi qürur hissi və başucalığı ilə qeyd edir.

Ümumrayon anım mərasimində icra başçısı rayonun şəhid ailələri, Qarabağ müharibəsi iştirakçıları, ağsaqqallar və veteranlarla görüşüb, qayğıları ilə maraqlanıb, müraciətlərdə qaldırılan məsələlərin həlli üçün aidiyyəti üzrə tapşırıqlarını verib.

20 Yanvar faciəsinin 36-cı ildönümü münasibətilə rayonda dövlət bayraqları endirilib, saat 12:00-da şəhidlərimizin əziz xatirəsi bir dəqiqəlik sükutla yad edilərək rayon ərazisində nəqliyyatın hərəkəti dayandırılıb, avtomobillər vasitəsilə səs siqnalları verilib.