Avropada siyasətçilər yay tətilinə çıxaraq sahil bölgələrinə, kənd evlərinə və rəsmi iqamətgahlara üz tutublar. Lakin Ukraynada davam edən müharibə, Yaxın Şərqdə gərginlik, iqtisadi problemlər və meşə yanğınları fonunda liderlərin istirahəti heç də rahat keçmir.

“Qafqazinfo” xəbər verir ki, Brüssel və Avropanın bir sıra paytaxtlarında siyasi fəaliyyətin nisbətən səngidiyi yay aylarında liderlər ailələri ilə vaxt keçirməyə çalışırlar.

Bununla belə, böhranların davam etməsi onların tətil zamanı belə gündəlik siyasi proseslərdən tam uzaqlaşmasına imkan vermir.

Üstəlik, liderlərin tətil seçimləri ictimaiyyətin diqqətindən yayınmır. Xüsusilə bahalı və dəbdəbəli istirahət planları böhran dövründə siyasi reputasiya baxımından əlavə risk yarada bilər.

Ursula fon der Lyayen

Avropa Komissiyasının Prezidenti Ursula fon der Lyayen builki tətilinin dəqiq yerini açıqlamayıb. O, avqustun əvvəlində sosial media hesabında günəş eynəyi ilə fotosunu paylaşaraq izləyicilərinə rahat tətil arzulayıb.

Avropa Komissiyasının sözçüsü bildirib ki, Lyayen hazırda ailəsi ilə vaxt keçirir, lakin Brüsseldəki komandası və digər komissarlarla əlaqəni davam etdirir.

Onun rəsmi vəzifələrindən uzaq vaxtlarını Almaniyanın Hannover şəhəri yaxınlığındakı ailə evində keçirdiyi məlumdur. O, burada atları saxladığı fermada toyuq və keçi də bəsləyir.

Avqust ayında fermadan paylaşdığı videoda o, Çikeletta adlı toyuğunu nümayiş etdirərək, onun iki balasına ad qoymaq üçün izləyicilərindən təklif istəyib.

Lyayenin əvvəlki tətil seçimləri isə mübahisəsiz ötüşməyib. 2023-cü ildə onun Yunanıstanın Baş naziri Kiriakos Mitsotakisin Krit adasındakı mülkündə istirahət etməsi tənqidlərə səbəb olmuşdu.

Emmanuel Makron

Fransa Prezidenti Emmanuel Makron həyat yoldaşı Bricit Makronla birlikdə Kot-d'Azurdakı rəsmi prezident iqamətgahı olan Fort de Breqanşonda istirahət edir.

Makronun prezident kimi son yay tətilini keçirdiyi bu məkan onun hakimiyyəti dövründə bir sıra mühüm görüşlərə ev sahibliyi edib. 2019-cu ildə burada Rusiya Prezidenti Vladimir Putini də qəbul edib.

Makron artıq burada hidrosikl sürərkən görüntülənib. Bu isə bəzi tənqidçilərin onu ölkədəki sosial və iqtisadi problemlərdən uzaq olmaqda ittiham etməsinə səbəb olub.

Yelisey Sarayının məlumatına görə, Makron tətil zamanı da siyasi fəaliyyətini davam etdirir. O, son günlərdə meşə yanğınlarından zərər çəkən Jironda bölgəsinin merləri ilə görüşüb.

Fransa Prezidenti həmçinin Misir Prezidenti Əbdülfəttah əs-Sisi, Səudiyyə Ərəbistanının vəliəhdi Məhəmməd bin Salman və İraqın Baş naziri Məhəmməd Şia əs-Sudani ilə telefon danışığı aparıb.

Pedro Sançez

İspaniyanın Baş naziri Pedro Sançez də yay tətili zamanı ölkəsindəki ciddi problemlərlə məşğul olmağa davam edir.

Sançez iyulun sonunda İspaniyanın Şimali Afrikadakı Seuta şəhərində yaşanan miqrasiya böhranından sonra ofisini Madriddən Kanar adalarındakı Lanzarote adasında yerləşən rəsmi iqamətgahına köçürüb.

İspaniya mediasının məlumatına görə, baş nazir avqustun əvvəlindən rəsmi fəaliyyətini buradan həyata keçirir.

Sançez Seutadakı vəziyyətlə bağlı bir sıra onlayn görüşlər keçirib. Nazirlər Kabinetinin iclaslarından biri də onlayn formatda təşkil olunub.

İspaniya hökuməti Seutadakı vəziyyətin hələ tam normallaşmadığını bildirir. Böhran fonunda Sançezin tətil planları müxalifətin də tənqidinə səbəb olub.

Corciya Meloni

İtaliyanın Baş naziri Corciya Meloni tətilini 9 yaşlı qızı və bacısı ilə birlikdə ölkənin cənubundakı Apuliya bölgəsində, Adriatik dənizi sahilində keçirir.

İtaliya mediasının məlumatına görə, Meloninin yaxın dostları və siyasi müttəfiqləri də Brindisi yaxınlığındakı fermada ona qoşula bilər.

Apuliya Meloninin iki il əvvəl G7 sammitinə ev sahibliyi etdiyi bölgədir. Həmin vaxt qəbul etdiyi liderlərin əksəriyyəti artıq vəzifədə deyil.

Meloninin qarşısında isə siyasi baxımdan mühüm dövr dayanır. O, 2027-ci ildə keçiriləcək seçkilərə hazırlaşır və vəzifəsində qalacağı təqdirdə İtaliyanın ən uzun müddət hakimiyyətdə olan baş naziri olmaq rekorduna yaxınlaşa bilər.

Fridrix Merts

Almaniya Kansleri Fridrix Merts həyat yoldaşı Şarlotta ilə birlikdə Almaniyada qısamüddətli istirahət edir.

Kanslerin ofisi onun tətil planları barədə ətraflı məlumat verməyib. Lakin sözçüsü bildirib ki, Merts daim əlçatandır və sentyabrda siyasi fəaliyyətin intensivləşməsinə hazırlaşır.

“Frankfurter Allgemeine Zeitung” qəzetinin yazdığına görə, katolik kansler tətilə Papa XIV Leonun süni intellekt mövzusundakı ensiklikası olan “Magnifica humanitas”ın nüsxəsini də özü ilə aparıb.

Sənəddə süni intellektin risklərinə diqqət çəkilir və texnologiyanın insanlara xidmət etməli, insan ləyaqətini qorumalı olduğu vurğulanır.