Niderlandda kral ailəsinin hərbi xidmətə qoşulması ölkədə orduya marağı əhəmiyyətli dərəcədə artırıb.

“Qafqazinfo” xəbər verir ki, Kraliça Maksima və tac şahzadəsi Katarina-Amaliyanın ehtiyat hərbi xidmətə başlaması fonunda könüllülərin sayı kəskin yüksəlib.

Ölkənin Müdafiə Nazirliyi qeyd edib ki, artan müraciət axını səbəbindən ordu artıq yeni əsgərlərin silahlandırılması, yerləşdirilməsi və təlimi üçün əlavə iş saatları ilə fəaliyyət göstərir. Nazirlik daxilində bu artım qeyri-rəsmi olaraq “Amaliya effekti” adlandırılır.

Müdafiə naziri Derk Bosveyk bildirib ki, hazırda müraciətlərin sayı mövcud imkanları üstələyir. Onun sözlərinə görə, əsas çətinliklər təlim infrastrukturu, mənzil təminatı və logistika ilə bağlıdır, lakin bu vəziyyət “müsbət problem” kimi qiymətləndirilir.

Hazırda Niderlandda təxminən 9 min ehtiyat hərbçi var. Hökumət 2030-cu ilə qədər bu rəqəmi ən azı 20 minə çatdırmağı hədəfləyir. Ümumilikdə isə ölkənin hərbi personalının sayının 2035-ci ilə qədər 80 mindən 120 minə yüksəldilməsi planlaşdırılır.

Bu tendensiya Avropada daha geniş hərbi güclənmə prosesinin bir hissəsi kimi qiymətləndirilir. Xüsusilə Rusiyanın Ukraynaya qarşı müharibəsi və NATO daxilində təhlükəsizlik narahatlıqları bir çox ölkələri ordularını genişləndirməyə və modernləşdirməyə sövq edir.

Niderlandda ehtiyat hərbçilər, əsasən, daxili təhlükəsizlik, fövqəladə hallar və humanitar missiyalarda iştirak edir. Onlar ildə təxminən 300 saat xidmət göstərir və zərurət yaranarsa, təbii fəlakətlər zamanı da səfərbər olunurlar.