Moskvadakı paradda hərbi texnika olmayacaq
Moskvada faşizm üzərində qələbənin 81-ci ildönümünə həsr olunan parad hərbi texnikanın iştirakı olmadan keçiriləcək.
“Qafqazinfo” xəbər verir ki, bu barədə Rusiyanın Müdafiə Nazirliyi məlumat yayıb.
Nazirlik səbəb olaraq hazırda davam edən hərbi əməliyyatlarla bağlı cari operativ vəziyyəti göstərib.
Paradda həmçinin Suvorov hərbi və Naximov məktəblərinin, kadet korpuslarının şagirdlərinin iştirak etməyəcəyi bildirilir.
Əvəzində yayım zamanı Rusiya Silahlı Qüvvələrinin hərbi əməliyyatlarda iştirak edən, döyüş növbəsi və döyüş xidməti daşıyan bütün qoşun növlərinin hərbi qulluqçularının fəaliyyəti nümayiş olunacaq. Onlar sırasında Strateji Təyinatlı Raket Qoşunlarının, Hərbi-Kosmik Qüvvələrin idarəetmə məntəqələrindəki, eləcə də Hərbi-Dəniz Donanmasının gəmilərindəki heyətləri var.
Paradın aviasiya hissəsi isə baş tutacaq. Belə ki, Qələbə paradı zamanı Qırmızı Meydanın üzərindən Rusiyanın aviasiya qruplarının təyyarələri uçacaq.
“Paradın sonunda “Su-25” hücum təyyarələrinin pilotları Moskva səmasını Rusiya bayrağının rənglərinə boyayacaq”, - məlumatda deyilir.
Son Xəbərlər
