Zimbabveli yazıçı Su Nyatinin ilk romanı nəşriyyatların “bu kitab satılmayacaq” düşüncəsi ilə rədd edilməsinə baxmayaraq, “Netflix”də ekranlaşdırılmasından sonra qlobal uğur qazanıb.

“Qafqazinfo” xəbər verir ki, Nyatinin evli kişinin gizli münasibətlərindən bəhs edən “Çoxarvadlı” romanı 2012-ci ildə müəllif tərəfindən öz hesabına nəşr olunub.

Yazıçı redaktor, dizayner və illüstrator taparaq kitabın ilk 500 nüsxəsini çap etdirib.

Nəşriyyatların proqnozlarının əksinə olaraq, əsər böyük maraq doğurub. Daha sonra “Netflix” tərəfindən ekranlaşdırılan əsər platformada 60-dan çox ölkədə ən çox izlənilən 10 serial arasında yer alıb. ABŞ-də isə ikinci pilləyə yüksəlib.

Hollivud aktrisası Taraci P.Henson da seriala maraq göstərib və bütün 22 bölümü bir gündə izlədiyini bildirib.

Çoxarvadlılıq Nyati üçün yalnız ədəbi mövzu deyil. Müəllifin ana tərəfdən ailəsində bu ənənə nəsillər boyu mövcud olub. 1979-cu ildə vəfat edən babasının beş, ulu babasının isə 11 arvadı olduğu bildirilir.

Nyatinin ana tərəfdən nənəsi ailədə qadınların birlikdə yaşadığı və yeni arvadların seçilməsində də iştirak etdiyi bir sistem formalaşdırıb.

Nyati BBC-yə danışarkən həmin dövrü belə xatırlayıb: “Hər kəs öz yerini bildiyi üçün daxili münaqişə yox idi. Nənəmdən bu barədə soruşanda o, mənə praktik cavab verdi; həm fiziki, həm də emosional yükü bölüşmək üçün daha çox əl var idi. Hər şey açıq idi”.

Müəllif 2001-ci ildə Hararedə işləyərkən müşahidə etdiyi vəziyyətin ailəsindəki ənənədən fərqli olduğunu bildirib. Onun sözlərinə görə, monoqam münasibətdə olduqlarını deyən bəzi kişilər, əslində, gizli münasibətlər və gizli evliliklərlə çoxarvadlı həyat sürürdülər.

Nyati romanında razılıq və açıqlıq üzərində qurulan ənənəvi modeldən fərqli olaraq, aldatma və istismara əsaslanan bu münasibətləri araşdırıb.

“Mən çoxarvadlılığa qarşı deyiləm. Mən iradə çatışmazlığına qarşıyam. Oyun qaydalarını işə qarışdıqdan sonra dəyişdirmək düzgün deyil”, - deyə yazıçı bildirib.

Romanın əsas qəhrəmanı Coys özünü monoqam evlilikdə hesab edir. Lakin sonradan iş adamı əri Conasinin gizlicə başqa qadınlarla evləndiyini və onlarla birlikdə yaşadığını öyrənir.

Əsərdə Coys və Conasinin şirkətində çalışan digər həyat yoldaşı Matipa iqtisadi baxımdan ərindən asılı vəziyyətdədir. Bu asılılıq qadınların qərar vermək imkanlarını və şəxsi muxtariyyətlərini məhdudlaşdırır.

Serialda hadisələr Cənubi Afrikaya köçürülüb və hekayə Zulu dilində ekranlaşdırılıb. Eyni zamanda, Conasinin həyat yoldaşlarının sayı azaldılıb.

Nyatinin sözlərinə görə, ekran işi varlı qaradərili afrikalı obrazları ön plana çıxararaq mövcud stereotiplərdən uzaqlaşmağa çalışıb.

Uşaqlıqdan yazmağa marağı olan Nyati ailəsinin tövsiyəsi ilə təxminən 20 il maliyyə sektorunda investisiya analitiki kimi çalışıb. O, “Çoxarvadlı” romanını əsas işindən sonra axşamlar yazıb.

Kitabın nəşrindən bir neçə il sonra, 40 yaşında korporativ karyerasını başa vuraraq tamamilə yazıçılığa yönəlib. Hazırda 48 yaşında olan Nyati iki ildir üzərində çalışdığı tarixi romanının ilk qaralamasını tamamlamaq üzrədir. Yazıçı xüsusilə subay ana kimi yaradıcılıq fəaliyyətini davam etdirmək üçün ciddi maliyyə fədakarlıqları etdiyini bildirib.