ABŞ və İran arasında diplomatik danışıqların yenidən başlaya biləcəyi ilə bağlı gözləntilər neft qiymətlərinin 100 dollardan aşağı düşməsinə səbəb olub.

“Qafqazinfo” xəbər verir ki, bazar günü 105 dollara yüksələn “Brent” neftinin fyuçersləri günü 103,87 dollarla başa vurub.

Dünən axşam saatlarına olan məlumata görə, noyabr ayı üçün “Brent” fyuçersləri təxminən 4 faiz ucuzlaşaraq 99,75 dollara düşüb. Qərbi Texas neftinin (WTI) noyabr fyuçersləri isə 92,14 dollardan satılıb.

Qiymətlərin enməsinə əsas səbəb BMT Baş Assambleyası çərçivəsində ABŞ və İran arasında diplomatik təmasların Yaxın Şərqdəki gərginliyi azaltması və danışıqların bərpasına yol aça biləcəyi gözləntiləridir.

ABŞ Prezidenti Donald Trampın BMT Baş Assambleyası çərçivəsində İran Prezidenti Məsud Pezeşkianla görüşməyə açıq olduğunu bildirməsi də bazarlarda gərginliyin azalacağına dair gözləntiləri gücləndirib. Bu isə xüsusilə Hörmüz boğazı üzərindən neft daşınması ilə bağlı təchizat risklərinin azalacağı ehtimalını artırıb.

Neft qiymətlərinə təsir edən digər amil Səudiyyə Ərəbistanının xam neft ixracının bərpasıdır.

“Kpler”in ilkin məlumatlarına görə, ölkənin xam neft ixracı avqustda 2013-cü ildən bəri ən aşağı səviyyəyə – gündə 2,4 milyon barrelə düşdükdən sonra sentyabrda 4 milyon barreldən yuxarı qalxıb.

“JPMorgan” analitikləri də sentyabrın 18-də Yaxın Şərqdən neft axınının güclü olaraq qaldığını bildiriblər. Onların hesablamalarına görə, son 10 gündə regiondan gündəlik neft axını orta hesabla 17,1 milyon barrel təşkil edib.

Neft bazarına təsir edən amillərdən biri də ABŞ Federal Ehtiyat Sisteminin (FED) faiz siyasətidir.

FED-in ötən həftə 2023-cü ilin iyulundan bəri ilk dəfə faiz dərəcəsini artırmasından sonra ilin sonuna qədər əlavə artımlar gözləntiləri güclənib. ABŞ-də yüksək enerji xərclərinin inflyasiya təzyiqini artırması iqtisadi fəallığın və neft tələbatının zəifləyə biləcəyi ilə bağlı proqnozları gücləndirir.

Bundan başqa, sərt pul siyasəti dolları möhkəmləndirir ki, bu da nefti digər valyutalardan istifadə edən alıcılar üçün bahalaşdıraraq qiymətlərə aşağı istiqamətdə təzyiq göstərir.