Güclü qar səbəbilə Astara rayonu və bir neçə kənd arasındakı yol bağlanıb. 

Bu barədə “Qafqazinfo”ya Milli Qəhrəman Pəncəli Teymurovun qardaşı Famil Teymurov məlumat verib. 

Asxanakəran kənd sakini F.Teymurov bildirib ki, vəziyyətlə bağlı aidiyyəti üzrə müraciətlər etsələr də baxılmır:

“Bir neçə gündür yollar bağlıdır. Astara rayonunun Asxanakəran, Hamuşam, Toradi və Motlayataq kəndlərində vəziyyət dəyişməz olaraq qalır. Kəndlərdə nə internet var, nə işıq, nə də yollar açılıb. Aramsız yağan qar səbəbindən yaşayış məntəqələri arasında əlaqə tamamilə kəsilib. Üstəlik, nə yollara texnika göndərilib, nə də buna hər hansı bir cəhd olunub. Kənd əhalisi ərzaq üçün rayona gedə bilmir. Çıxmışıq dağın başına ki, heç olmasa buradan əlaqə yarada bilək. Ölsək, heç kimin xəbəri olmayacaq, dünya ilə əlaqəmiz kəsilib”.

Məsələ ilə bağlı Astara Rayon İcra Hakimiyyəti başçısının köməkçisi Asiman Qasımlı saytımıza bildirdi ki, hazırda yollarda təmizlik işləri aparılır:

“Hamuşam kəndindən rayona gedən yollar təmizlənir. Eyni zamanda əks istiqamətdə də təmizlik gedir. Qarın hündürlüyü çox olduğu üçün təkərli texnikalar hərəkət edə bilmir. Bizə iri, sepli texnikalar lazım idi ki, rahat hərəkət edə bilsin. Qarın hündürlüyü müxtəlif yerlərdə 1 metr 20 santimetrdən 1 metr 60 santimetrə qədərdir. Hazırda qar yağmır, yolun açılması istiqamətində işlər görülür. Lakin gün sonuna qədər yolların tam açılacağını dəqiq deyə bilmərik”. 

***

Astara Rayon İcra Hakimiyyətindən saytımıza verilən növbəti açıqlamada bildirilib ki, hazırda kəndlərdən rayona gedən yollarda təmizlik işləri davam etdirilir. Bununla bağlı redaksiyamıza video da göndərilib. 

Lamiyə Məmmədova