Məşhur milad filmlərindən olan “Evdə tək”in ulduzu Makoley Kalkin pərəstişkarları üçün 3 qayda hazırlayıb. 

“Qafqazinfo” “People”a istinadən xəbər verir ki, “SmartLess” podkastının buraxılışında qonaq olan aktyor uşaqlıq yaşlarında qazandığı şöhrət barədə danışıb.

Aparıcının ona ictimai yerlərdə özünü necə aparması ilə bağlı ünvanladığı suala Kalkin belə cavab verib:

“Çölə çıxmazdan əvvəl özümü mütləq hazırlamalı oluram. Sadəcə özüm və pərəstişkarlarım üçün müəyyən qaydalar qoymuşam. Yemək masasındaykən mənə yaxınlaşmayın, bunu sevmirəm. Uşaqlarımla birlikdə olanda da yaxınlaşmayın. Qətiyyən arxamca tualetə gəlməyin. Artıq anlaylram ki, ünsiyyəti idarə edən tərəf mənəm”. 

Aktyor bildirib ki, 14 yaşında olarkən normal həyat yaşamaq üçün 10 il aktyorluğa ara verib: “Mən bitirmişdim. Dedim ki, “ümid edirəm pulunuzu qazandınız, çünki mən daha olmayacam. Adımı qazandım, izimi qoydum, sərvətimi topladım. İndi işləməyimin yeganə səbəbi bunu sevməyimdir”.

Makoley Kalkin son olaraq “Zootopiya 2” animasiya filmində bir personajı səsləndirib və “Prime Video” platformasında yayımlanan “Fallout” serialının 2-ci mövsümündə rol alıb. Bununla belə, aktyor hazırda təqaüddə olduğunu deyib:

“Mən təqaüdə çıxıram, xoşuma gələn bir iş tapanda geri qayıdıram, onu edirəm və dərhal yenidən təqaüdə çıxıram. Hər işim sonuncu işimdir”.

Qeyd edək ki, M. Kalkin 1990-cı ildə çəkilmiş “Evdə tək 1”, 1992-ci ildə ekranlara çıxmış “Evdə tək 2” filmlərində Kevin rolunu canlandırıb. 

Kalkin 17 yaşında aktrisa Reyçel Maynerlə ailə həyatı qurmuş, lakin onların bərabərliyi çox davam etməmişdi. Məşhurlar 2002-ci ildə boşanmaq qərarına gəlmişdi. Hazırda o, 37 yaşlı nişanlısı Brenda Sonqla birlikdədir. Onların iki övladı var.