Süni intellektin gələcəkdə işçi qüvvəsinə mümkün təsirləri ilə bağlı yayımlanan və “qiyamət ssenarisi” kimi xarakterizə olunan hesabat qlobal bazarlarda ciddi dalğalanma yaradıb.

“Qafqazinfo” xəbər verir ki, hesabatın dərcindən sonra texnologiya və maliyyə sektorunda fəaliyyət göstərən iri şirkətlərin səhmlərində kəskin eniş qeydə alınıb.

“Citrini Research” tərəfindən yayımlanan “2028 Qlobal Kəşfiyyat Böhranı” adlı hesabatda müasir iqtisadiyyatın əsas dayaqlarından biri olan insan zəkasının tədricən maşın zəkası ilə əvəz olunduğu iddia edilir.

Sənəddə qeyd olunur ki, maliyyə sistemi onilliklər ərzində insan zehni və qərarvermə mexanizmləri üzərində qurulub. Lakin süni intellekt texnologiyalarının sürətli inkişafı bu modeli köklü və ağrılı yenidənqiymətləndirmə mərhələsinə sürükləyə bilər.

Hesabatın geniş yayılması fonunda süni intellekt inteqrasiyasına malik proqram təminatı şirkətlərinin səhmləri ciddi dəyər itirib.

“Datadog”, “CrowdStrike”, “Zscaler” şirkətlərinin səhmləri 9 faizdən çox ucuzlaşıb.

Eyni zamanda, IBM (International Business Machines Corporation) 2000-ci ildən bəri ən pis gündəlik performansını göstərərək 13 faiz dəyər itirib. “DoorDash”ın səhmləri də 6,6 faiz geriləyib.

Analitiklər hesab edir ki, gələcəkdə süni intellekt əsaslı köməkçi sistemlər çatdırılma proseslərini daha aşağı xərclə idarə edə bilər.

“DoorDash”ın həmtəsisçisi Endi Fanq bildirib ki, sektor süni intellekt əsaslı ticarət modelinə uyğunlaşmalıdır. Onun sözlərinə görə, bazarda “yer ayaqların altından sürüşür”.

Son illərdə bazarlarda süni intellekt yönümlü investisiyaların dominantlığı ekspertlər arasında “fond bazarı köpüyü”nün formalaşıb-formalaşmadığı ilə bağlı müzakirələri artırıb. Mütəxəssislər investorların həddindən artıq optimizminin şirkətlərin real dəyərindən uzaq qiymətləndirilməsinə və qəfil bazar enişlərinə yol aça biləcəyini bildirirlər.

“GammaRoad Capital Partners” şirkətinin investisiya strateqi Cordan Rizzuto süni intellektin yaratdığı struktur dəyişikliklərin gözləniləndən daha sürətlə baş verdiyini qeyd edib.

Analitiklər əlavə edirlər ki, ABŞ-nin ticarət siyasəti ilə bağlı qeyri-müəyyənliklər də qlobal bazarlarda müşahidə olunan enişə təsir göstərən amillər sırasındadır.