Oktyabrın 5-də axşam saatlarında Gəncədə bıçaqlanaraq qətlə yetirilən 1979-cu il təvəllüdlü Anar Hüseynovun dini zəmində qətlə yetirildiyi iddia edilir.

“Qafqazinfo” xəbər verir ki, Gəncədə şiə dindar kimi tanınan 43 yaşlı A.Hüseynovun boğaz nahiyəsinə bıçaqla xəsarət yetirərək onu öldürən 1993-cü il təvəllüdlü Ramil Musayevin başqa dini təriqətin üzvü olduğu bildirilib.

Məlumata görə, Sahil küçəsində A.Hüseynovun qonşusu olan R.Musayev bir müddət əvvəl onun digər dini təriqət mənsubları barədə dediyi sözlərə görə yaranmış mübahisəyə müdaxilə edib. O, mübahisə zəminində bıçağı Anarın boğazına soxub. Ağır xəsarət alan şəxs oktyabrın 6-da səhər saatlarında xəstəxanaya çatdırılıb, lakin çoxlu qan itirdiyindən o vəfat edib.

Faktla bağlı Gəncə Şəhər Prokurorluğunda Cinayət Məcəlləsinin 126.3-cü (qəsdən sağlamlığa ağır zərər vurma ehtiyatsızlıqdan zərərçəkmiş şəxsin ölümünə səbəb olduqda) maddəsi ilə cinayət işi başlanıb. Ramil Musayev şübhəli şəxs qismində tutularaq istintaqa cəlb edilib.

***

Daxili İşlər Nazirliyinin (DİN) Mətbuat Xidmətinin Gəncə regional qrupunun baş inspektoru Eşqin Qasımov hadisə ilə bağlı bildirib ki, iddialar həqiqətə uyğun deyil: "Hadisə baş verən zaman Ramil Musayev spirtli içkinin təsiri altında olub. Qətli törədən şəxs ifadəsində də bu xüsusatı təsdiq edib. HAzırda şəhər prokurorluğunda cinayət işi başlanılıb. Araşdırmalar davam etdirilir".