Yaxın Şərqdə davam edən gərginlik fonunda İran və ABŞ arasında yeni diplomatik təmasların başlanacağı bildirilir.

“Qafqazinfo”nun xəbərinə görə, bir iranlı rəsmi CNN-ə açıqlamasında qeyd edib ki, tərəflər arasında növbəti görüşlərin bazar ertəsi Pakistan ərazisində keçirilməsi planlaşdırılır.

ABŞ tərəfi danışıqları rəsmi şəkildə təsdiqləməsə də, Prezident Donald Tramp proseslə bağlı nikbin mövqe sərgiləyib. O, Arizonanın Feniks şəhərində “Turning Point USA” tədbirində çıxışı zamanı bildirib ki, “bir çox yaxşı hadisələr baş verir” və danışıqların əsas hissəsi artıq razılaşdırılıb.

Tramp daha əvvəl İranın zənginləşdirilmiş uranı ölkədən çıxarmaq və ABŞ ilə birgə işləmək də daxil olmaqla, “hər şeyə razı olduğunu” deyib. Lakin İran rəsmisi bu açıqlamaların bir qismini təkzib edərək, onları “alternativ faktlar” adlandırıb.

O, Tehranın zənginləşdirilmiş uranı xaricə göndərmək və ya zənginləşdirməni qeyri-müəyyən müddətə dayandırmaq niyyətində olmadığını vurğulayıb.

Eyni mənbə xəbərdarlıq edib ki, Trampın ictimai açıqlamaları danışıqların gedişinə mənfi təsir göstərə bilər. Onun sözlərinə görə, İran nəticəyə yönəlmiş diplomatiyaya sadiq qalsa da, ABŞ-nin diplomatik prosesi uzadaraq mümkün yeni təzyiq və ya hərbi addımlar üçün istifadə edə biləcəyi ilə bağlı narahatlıqlar var.

Regionda paralel olaraq digər proseslər də diqqət çəkir. Hörmüz boğazı ətrafında gərginliyin azalması fonunda neft qiymətləri aşağı düşüb, qlobal bazarlarda isə artım qeydə alınıb. ABŞ-də “S&P 500” və “Nasdaq Composite” indeksləri rekord səviyyələrə yüksəlib.

Bununla yanaşı, Hörmüz boğazının açıq elan edilməsinə baxmayaraq, gəmiçilik şirkətləri ehtiyatlı davranmaqda davam edir.