Gündəlik həyatda lift əvəzinə pilləkənlərdən istifadə etmək ürək-damar sağlamlığı üçün gözləniləndən daha böyük fayda verə bilər. Yeni genişmiqyaslı araşdırmaya görə, həftədə bir neçə dəfə cəmi bir neçə dəqiqə pilləkən qalxmaq belə ürək-damar xəstəlikləri riskini azaltmağa kömək edə bilər.

“Qafqazinfo” xəbər verir ki, Şərqi İngiltərə Universiteti və Norfolk və Norviç Universiteti Xəstəxanasının tədqiqatçıları müntəzəm olaraq pilləkənlə qalxan insanların ürək-damar xəstəliklərindən ölmə riskinin pilləkənlərdən daha az istifadə edənlərlə müqayisədə 39 faiz aşağı olduğunu müəyyən ediblər.

Onların hər hansı səbəbdən ölüm riski isə 24 faiz daha az olub.

Pilləkənlə qalxanlarda infarkt, insult və ürək çatışmazlığı kimi ciddi ürək-damar xəstəliklərinin yaranma riskinin də daha aşağı olduğu müəyyənləşdirilib.

Tədqiqatçılar 35-84 yaş arasında 480 mindən çox insanın məlumatlarını təhlil ediblər. Araşdırmaya orta hesabla 14 il ərzində aparılmış müşahidələrə əsaslanan doqquz yüksəkkeyfiyyətli tədqiqat daxil edilib.

Şərqi İngiltərə Universitetinin Norviç Tibb Məktəbindən Vassilios Vassiliou bildirib ki, pilləkənlə qalxmaq gündəlik həyata fiziki aktivlik əlavə etməyin praktik və çox vaxt diqqətdən kənarda qalan üsuludur.

Onun sözlərinə görə, pilləkənlərdən istifadə etmək üçün xüsusi vaxt ayırmağa və ya idman zalına getməyə ehtiyac yoxdur. İnsanlar evdə, işdə və ya gündəlik işlərini görərkən bu vərdişi asanlıqla tətbiq edə bilərlər.

Araşdırmaya görə, həftə ərzində bir neçə dəfə bir neçə dəqiqə pilləkən qalxmaq belə ürək-damar sağlamlığına müsbət təsir göstərə və xolesterinin səviyyəsinin aşağı düşməsinə kömək edə bilər.

Tədqiqatçılar pilləkənlərdən istifadə artdıqca sağlamlıq faydalarının da artdığını bildiriblər. Bununla belə, hətta kiçik dəyişikliklərin belə ölçülə bilən təsir göstərdiyi vurğulanıb.

Mütəxəssislər bu nəticələrin gündəlik həyatda fiziki aktivliyin artırılmasının əhəmiyyətini göstərdiyini qeyd edirlər. Onların fikrincə, lift və pilləkən arasında seçim etmək imkanı olduqda, ürək sağlamlığı baxımından pilləkənlərə üstünlük vermək sadə, lakin faydalı vərdiş ola bilər.