FIFA prezidenti Canni İnfantino 2026-cı il dünya çempionatının yekunlarından sonra quruma və turnirə yönələn tənqidlərə sərt cavab verib.

“Qafqazinfo”nun xəbərinə görə, İnfantino şəxsi instaqram hesabında paylaşım edərək, FIFA-nı müdafiə edib və tənqidçiləri “nifrət və yalan şayiələr yaymaqda” ittiham edib.

O, onları vaxt və enerjilərini FIFA-ya nifrət etməyə sərf etməkdənsə, “meditasiya etməyə, dua etməyə və ya futbol matçına baxmağa” çağırıb.

FIFA rəhbəri ABŞ, Kanada və Meksikanın birgə ev sahibliyi etdiyi 2026-cı il DÇ-ni “yer üzündəki ən böyük tədbir” adlandırıb. Onun sözlərinə görə, turnir “bəşəriyyəti ən yaxşı şəkildə” nümayiş etdirib.

İnfantino turnir zamanı yaşanan bəzi mübahisələrə də münasibət bildirib. O, xüsusilə ABŞ və İran arasında davam edən siyasi gərginliyə baxmayaraq, İran millisinin DÇ-də iştirakını FIFA-nın uğuru kimi təqdim edib.

“FIFA müharibə şəraitində olan iki ölkəni bir araya gətirmək üçün yorulmadan çalışdı. İran ölkəyə heç bir insident və ya münaqişə olmadan daxil oldu”, – deyə İnfantino bildirib.

Lakin onun bu fikirləri İran millisinin baş məşqçisi Əmir Qalenoinin açıqlamaları ilə ziddiyyət təşkil edib. Qaleno komandasının turnir zamanı özünü “ən çox məzlum” tərəf kimi hiss etdiyini söyləyib.

İran nümayəndə heyətinin bəzi üzvlərinə ABŞ-yə giriş icazəsi verilməyib, azarkeşlərin biletləri ləğv edilib. Komanda isə hazırlıq prosesi zamanı logistika problemləri səbəbindən təlim bazasını ABŞ-nin Arizona ştatındakı Tuson şəhərindən Meksikanın Tixuana şəhərinə köçürüb.

İnfantino bu problemləri də şərh edib: “Siz vizadan imtina edilən azsaylı insanlardan danışdınız, lakin dünyanın hər yerindən təsdiqlənmiş milyonlarla insanı görməzdən gəldiniz. Çünki futbol dünyanı birləşdirir və bu yay bunu təsirli şəkildə nümayiş etdirdi”.

İnfantino paylaşımının sonunda tənqidçilərinə daha emosional mesaj göndərib.

O, DÇ-nin insanları bir araya gətirdiyini vurğulayaraq, turnirə “bir az sevgi” və “hörmət” göstərməyə çağırıb.

“Vaxtlarını və enerjilərini bizə nifrət etməyə sərf edənlərdən xahiş edirəm: bir anlıq dayanın, düşünün, meditasiya edin, dua edin və ya futbol matçına baxın. İnsanların üzlərinə, gözlərinə və duyğularına həqiqətən diqqət yetirin”, – deyə FIFA prezidenti bildirib.

İnfantino əlavə edib ki, dünyaya “nifrət deyil, sevgi; bölünmə deyil, tolerantlıq” lazımdır.

“FIFA prezidenti olaraq bu şouya, hətta kiçik bir şəkildə belə töhfə verdiyim üçün inanılmaz dərəcədə qürur duyuram. Bu, möhtəşəm hissdir”, – deyə İnfantino sözlərini yekunlaşdırıb.