Ötən gün aparıcı Şəhriyar Əbilov rəqqasə-aktrisa Oksana Rəsulova ilə 4 ildir evli olduğunu açıqlayıb. O, Rəsulovanın oğlu Osmanın atası olduğunu da bildirib. Aparıcının bu etirafı rezonans doğurub, sosial şəbəkələrin ən çox müzakirə olunan mövzusuna çevrilib.

Maraqlıdır ki, O. Rəsulova 2018-ci ilin noyabrında “Zaurla Günaydın” verilişində oğlunun atası haqda danışarkən onun Türkiyədə yaşayan azərbaycanlı iş adamı olduğunu demişdi: “Vaxt keçəcək hamı onu görəcək, tanıyacaq. Axırıncı dəfə (Bakıya-red.) bir ay əvvəl gəlib”.

Daha bir sual doğuran məqam - Oksana Şəhriyarla qonaq olduğu bütün proqramlarda dost olduqlarını, aralarında heç bir münasibətin yaşanmadığını deyirdi. Hətta 2019-cu ilin sonlarında aktrisa “Söhbət var” proqramında “Şəhriyarla yaxınlığımız həyat yoldaşımı narahat etmir, onu tanıyır” deyərək növbəti dəfə sadəcə dost olduqlarını etiraf etmişdi.

Belə olduğu halda, Ş. Əbilovun O. Rəsulova ilə illər sonra evli olduğunu açıqlaması anlaşılan deyil. Məsələ ilə bağlı O. Rəsulova ilə əlaqə saxlamağa çalışsaq da, zəngimizə cavab verməyib.

“Qafqazinfo”ya danışan Şəhriyar Oksananın “Osmanın atası Türkiyədə yaşayan azərbaycanlı iş adamıdır” deməsinə belə münasibət bildirib:

“Mən məgər iş adamı deyiləm? O qədər işim var ki... (gülür-red.). İş adamı o demək deyil ki, fabriki və ya böyük zavodu var. Bizim də balaca da olsa biznesimiz var. Türkiyədə iş görürük. Bir il orada yaşamışam”.

Əbilov Rəsulovanın “Şəhriyarla yaxınlığımız həyat yoldaşımı narahat etmir” deməsinə isə belə cavab verib:

“Oksananın tez-tez açıqlama verməyinin qarşısını ala bilməmişəm. Bizim sirlərimizin ortaya çıxmaması, fikri yayındırmaq üçün belə fikirlər söyləyirdi”.

Aparıcı əlavə edib ki, bu illər ərzində insanların reaksiyasına hazır deyildilər:

“Özümüz üçün öz həyatımızı artıq qurmuşduq. Övladımız var idi. İndi də şükür Allaha böyüyür. Çox istedadlı bir övladdır. Sadəcə insanlara bildirmək istəmirdik. Verilişdə vəziyyət elə gətirdi ki, bir anlıq beynimə gəldi, sıxıldım, dedim. Mən də öz övladımla rahat gəzmək, fotosessiyalar etdirmək istəyirəm. Buna ən azından haqqım var”.

Əlbəttə, hər iki məşhur simanın şəxsi həyatını gizlətmək haqqı var. Lakin illərlə yalan məlumatlar verib müxtəlif bəhanələrlə tamaşaçıları aldatmaq, doğrunu söyləməmək onlara qarşı hörmətsizlikdir. 

Hüseyn Məmmədsalahov