İngiltərə millisinin kapitanı Harri Keyn 2026-cı il dünya çempionatından kənarlaşdıqdan sonra gələcəyi ilə bağlı açıqlama verib.

“Qafqazinfo”nun xəbərinə görə, 32 yaşlı hücumçu 2030-cu il dünya çempionatında iştirak ehtimalını istisna etməyib və bu məsələdə Lionel Messini nümunə göstərib.

İngiltərə yarımfinalda Argentinaya 1:2 hesabı ilə məğlub olaraq turniri tərk edib. Görüşdən sonra Keyndən bunun onun üçün son DÇ olub-olmadığı soruşulub.

“Mənim üçün son dünya çempionatı? Messinin 39 yaşında oynadığını görmək məni bu barədə düşünməməyə vadar edir”, - deyə Keyn bildirib.

Bu ayın sonunda 33 yaşı tamam olacaq Harri Keyn 2030-cu il DÇ keçiriləndə 36 yaşında olacaq. Hücumçu hesab edir ki, yüksək səviyyədə çıxışını davam etdirə bilsə, gələcək turnirdə İngiltərə millisinin liderlərindən biri olaraq qala bilər.

Keyn 2026-cı il DÇ-də də İngiltərənin əsas simalarından biri olub. Lakin komanda final yolunda Argentinaya məğlub olaraq mübarizəni dayandırıb.

İngiltərə kapitanı Lionel Messinin uzunömürlü karyerasının futbolçular üçün nümunə olduğunu vurğulayıb. 39 yaşında DÇ-də çıxış edən argentinalı ulduz isə bu turnirdə də komandasının əsas liderlərindən biri olaraq qalır.

İngiltərənin 2026-cı il DÇ-də hələ bir oyunu qalıb. Tomas Tuxelin komandası üçüncü yer uğrunda görüşdə Fransa ilə qarşılaşacaq.