Ötən gecə Zərdabda ağır yol qəzası baş verib.

DİN-in Mətbuat Xidmətinin Şirvan regional qrupundan “Qafqazinfo”nun sorğusuna cavab olaraq bildirilib ki, hadisə saat 23 radələrində Kürdəmir - Zərdab yolunda baş verib.

Ağcəbədi rayon sakini Niyaməddin Quliyev idarə etdiyi “VGV U75 Plus” markalı avtomobillə hərəkətdə olan zaman idarəetməni itirib. Nəticədə avtomobil yoldan çıxaraq aşıb. Qəza zamanı nəqliyyat vasitəsində olan 2 nəfər hadisə yerində ölüb, sürücü və digər 6 nəfər sərnişin isə müxtəlif dərəcəli bədən xəsarətləri alıblar.

Faktla bağlı Zərdab RPŞ-də araşdırmalar aparılır.

Əldə etdiyimiz məlumata görə, qəzaya düşən avtomobildəki 9 nəfər bir ailənin üzvü və yaxın qohumlar olub. Hadisə nəticəsində ölənlərdən biri sürücü N.Quliyevin 13 yaşlı qızı, digəri isə yaxın qohumu olan 4 yaşlı qızdır.

***

Hadisə nəticəsində ağır xəsarətlər alan sürücü N.Quliyevin digər qızı isə səhər saatlarında xəstəxanada vəfat edib.

***

TƏBİB-dən bildirilib ki, ötən gün axşam saatlarında baş verən qəza zamanı avtomobildə 10 nəfər olub. Qəza nəticəsində 2011-ci il və 2000-ci il təvəllüdlü şəxs (qadın cinsli) hadisə yerində vəfat ediblər.

Yaralılar Zərdab Rayon Mərkəzi Xəstəxanasının təcili tibbi yardım bölməsinə gətirilib. Daha sonra onlardan 6 nəfər Ağcəbədi Rayon Mərkəzi Xəstəxanasının Travmatalogiya şöbəsinə, 2012-ci il təvəllüdlü şəxs (qadın cinsli) isə Sumqayıt Tibb Mərkəzinə təxliyə olunub.

Xəsarət alanlardan 2021-ci il təvəllüdlü şəxs (qadın cinsli) Zərdab Rayon Mərkəzi Xəstəxanasının Reanimasiya şöbəsinə yerləşdirilsə də tibbi müdaxilələrə baxmayaraq, vəfat edib.