Millətlər Liqasının A Liqasının “Uembli”də keçirilən maraqlı qarşılaşmasında İngiltərə və İspaniya üz-üzə gəlib.

“Qafqazinfo”nun xəbərinə görə, ilk hissədə 2:1 hesabı ilə önə keçən meydan sahibləri ikinci yarının əvvəlində penalti fürsətini də əldən verib.

Bundan sonra İspaniya iki qol vuraraq oyunu 3:2 hesabı ilə öz xeyrinə çevirib.

İspaniya matçın 107-ci saniyəsində hesabı açıb. Mark Geinin müdaxiləsindən sonra topu ələ keçirən Lamin Yamal sürətlə cərimə meydançasına daxil olaraq Ceyms Traffordun qapısına dəqiq zərbə ilə qol vurub.

İngiltərə ilk hissədə oyunun gedişini dəyişib. Cud Bellinqemin ötürməsindən sonra Entoni Qordon cərimə meydançasının kənarından dəqiq zərbə ilə hesabı bərabərləşdirib.

Qordonun qolundan cəmi üç dəqiqə sonra İngiltərə hesabda önə keçib. Harri Keynin başla vurduğu top Mark Kukurelyaya dəyərək istiqamətini dəyişib və qapıya daxil olub. Hesab 2:1 olub.

İkinci hissənin başlamasından səkkiz dəqiqə sonra İngiltərə üçüncü qola çox yaxın olub. VAR yoxlamasından sonra Rodrinin Cud Bellinqemə qarşı cərimə meydançasında qayda pozuntusu etdiyi müəyyənləşdirilib və penalti təyin olunub. Lakin Harri Keynin zərbəsi tirə dəyib. Bu fürsətdən yararlana bilməyən İngiltərə az sonra üstünlüyünü də əldən verib. Əvəzetmədən oyuna daxil olan Aleks Baena güclü zərbə ilə hesabı 2:2 edib.

İspaniya bununla kifayətlənməyib. Baenanın ötürməsindən sonra Mikel Oyarzabal topu Traffordun üzərindən aşıraraq komandasını 3:2 hesabı ilə önə keçirib.

Qalan dəqiqələrdə İngiltərə hesabı bərabərləşdirməyə çalışsa da, İspaniya üstünlüyünü qoruyub. Beləliklə, dünya çempionu “Uembli”də geridönüş edərək Millətlər Liqasının A Liqasına qələbə ilə başlayıb.