İslandiya Avropa İttifaqına (Aİ) üzvlüklə bağlı danışıqların bərpa edilib-edilməməsinə dair referendum keçirir. Təxminən 400 min əhalisi olan ölkədə səsvermənin nəticəsinin son dərəcə yaxın olacağı gözlənilir.

“Qafqazinfo” xəbər verir ki, sorğular “Bəli” və “Xeyr” tərəfdarları arasında fərqin az olduğunu göstərir.

Son sorğuda Aİ-yə üzvlüyü dəstəkləyənlərin 51,3 faizlə cüzi üstünlük qazandığı, əvvəlki sorğuda isə tərəflərin bərabər mövqedə olduğu bildirilir.

Aİ-yə üzvlüyə qarşı çıxanların əsas narahatlığı İslandiyanın suverenliyi və zəngin balıqçılıq suları üzərində nəzarətin zəifləməsidir.

Balıqçılıq və digər dənizçilik sahələri ölkənin ixracının təxminən 40 faizini təşkil edir. Buna görə də sektorda çalışanlar Aİ üzvlüyünün yerli şirkətlərə və iş yerlərinə mənfi təsir göstərə biləcəyindən ehtiyat edirlər.

Aİ-yə üzvlüyü dəstəkləyənlər isə Avropa ilə daha sıx əlaqələrin iqtisadi problemlərin həllinə kömək edəcəyini bildirirlər. Onların fikrincə, üzvlük İslandiyanın dəyişkən valyutasının yaratdığı riskləri azaltmaq, ticarəti asanlaşdırmaq və yaşayış xərcləri ilə bağlı problemləri yüngülləşdirmək üçün imkan yarada bilər.

Referendumda “Bəli” səsinin üstünlük qazanması İslandiyanın dərhal Aİ-yə üzv olması demək deyil. Bu halda Brüssellə üzvlük danışıqları yenidən başlayacaq.

Yekun üzvlük müqaviləsinin təsdiqi üçün isə ikinci referendum keçirilməlidir. Bundan başqa, müqavilənin Aİ-nin bütün 27 üzv dövləti tərəfindən təsdiqlənməsi tələb olunur.

“Xeyr” səsinin qalib gəlməsi isə üzvlük danışıqlarının ən azı indiki mərhələdə dayandırılması ilə nəticələnəcək.

İslandiya hazırda Aİ üzvü deyil, lakin Norveç və Lixtenşteynlə birlikdə Avropa İqtisadi Bölgəsinin üzvüdür. Bu çərçivə ölkəyə Aİ-nin vahid bazarına və Şengen zonasına çıxış imkanı verir.