Avropanın cənubu güclü meşə yanğınları ilə mübarizə aparır. Fransa və İspaniyada alovların sürətlə yayılması nəticəsində 100 mindən çox insan təhlükəli bölgələrdən çıxarılıb.

“Qafqazinfo” xəbər verir ki, hər iki ölkə yüksək temperatur, quraqlıq və güclü küləklərin təsirindən yaranan yanğınlarla bağlı Avropa İttifaqından yardım istəyib.

Alimlər bildirirlər ki, iqlim dəyişikliyi isti dalğalarının, quraqlığın və meşə yanğınlarının daha şiddətli və uzunmüddətli olmasına səbəb olur.

Fransanın cənub-qərbində baş verən böyük meşə yanğınları xüsusilə Atlantik sahillərində yerləşən Kap Ferret yarımadasını təhdid edib. Hakimiyyət ərazinin tamamilə boşaldılması barədə qərar verib.

Təxminən 110 min nəfərə, əsasən, turistlərə bölgəni tərk etmək tapşırılıb. Təxliyə əməliyyatlarına yardım məqsədilə əraziyə əlavə nəqliyyat vasitələri və qayıqlar cəlb olunub.

Fransanın daxili işlər naziri Loran Nunyes yanğının “konvektiv yanğın” xarakteri daşıdığını bildirib. Onun sözlərinə görə, belə yanğınlar öz istiliyini yaradır, istiqamətini qəfil dəyişə və daha sürətlə yayıla bilir.

Saumos kəndi yaxınlığında başlayan digər böyük yanğın isə Kap Ferret yarımadasından çıxan əsas yolu təhlükə altına salıb. Bu mövsüm Fransada qeydə alınan ən böyük yanğınlardan biri nəticəsində 14 min hektardan çox meşə sahəsi külə dönüb.

Rəsmi məlumatlara görə, 100-dən çox ev və bir düşərgə ərazisi yanğından ciddi zərər görüb. Fransa Prezidenti Emmanuel Makron yanğınsöndürmə əməliyyatlarına dəstək üçün ordu qüvvələrinin cəlb edildiyini açıqlayıb.

İspaniyada isə vəziyyət daha da ağırlaşıb. Madrid ətrafında bir neçə böyük meşə yanğınının birləşməsi nəticəsində ölkə tarixində ilk dəfə meşə yanğınları ilə bağlı milli fövqəladə vəziyyət elan edilib.

Madridin qərbindəki dağlıq ərazilərdə yaşayan 19 mindən çox insan təxliyə olunub. Yanğınların qarşısının alınması üçün 2 mindən çox əməkdaş və 10 yanğınsöndürmə təyyarəsi səfərbər edilsə də, alovların yayılmasının qarşısını almaq çətin olub.

Madrid Muxtar Vilayətinin rəhbəri İzabel Diaz Ayuso hadisəni bölgənin tarixindəki ən ağır meşə yanğınlarından biri adlandırıb.

“Çox yüksək temperatur və amansız külək mükəmməl bir fırtına yaratdı”, - deyə Ayuso bildirib.

Yanğından xilas olan Enrike Martin isə yaşadığı dəhşəti belə təsvir edib: “Evimi tərk etməli oldum. Qarşımda alov topu var idi. Beş dəqiqə geciksəydim, alov bizi məhv edə bilərdi”.

Madrid yaxınlığındakı yaşayış məntəqələrində ciddi dağıntılar qeydə alınıb. Yalnız bir ərazidə 43 ev tamamilə yanıb.

İspaniya polisi yanğınlardan biri ilə bağlı bir nəfəri saxlayıb. Onun ağır texnikadan istifadə edərək məhdud ərazidə yanğın törətməkdə şübhəli bilindiyi bildirilir.

Yüksək temperatur yalnız meşə yanğınlarına deyil, enerji sektoruna da təsir göstərir. Fransada çay sularının həddindən artıq istiləşməsi nüvə elektrik stansiyalarının fəaliyyətini məhdudlaşdıra bilər.

Ölkənin cənubundakı “Golfech-2” nüvə reaktoru isti hava səbəbindən iyulun əvvəlindən fəaliyyətini dayandırıb.

Həddindən artıq istilər kənd təsərrüfatına da zərbə vurub. Fransada qarğıdalı istehsalının yüksək temperatur və quraqlıq səbəbindən azala biləcəyi bildirilir.

İspaniya isə artıq ikinci ildir ki, ağır yanğın mövsümü yaşayır. Rəsmilər bu il ölkədə 29-dan çox böyük meşə yanğınının baş verdiyini açıqlayıb.