İsrail Baş naziri Benyamin Netanyahu ölkəsinin İrana qarşı genişmiqyaslı cavab zərbələrini hələlik təxirə saldığını elan edib.

“Qafqazinfo” BBC-yə istinadla xəbər verir ki, İsrail hökumətinin rəhbəri bu barədə xalqa televiziya vasitəsilə müraciətində bildirib.

İran və “Hizbullah” qruplaşmasının hazırda tarixin ən zəif dövrünü yaşadığını iddia edən Netanyahu mübarizənin hələ bitmədiyini vurğulayıb:

“Hazırda münaqişə nəzarət altına alınıb, çünki İsrail İranın raket zərbələrinə lazımi cavabı verib. Lakin onlarla mübarizəmiz hələ bitməyib. İran və “Hizbullah” indi əvvəlkindən daha zəifdir, biz isə əvvəlkindən daha güclüyük. Bir daha söz verirəm ki, İran heç vaxt nüvə silahı əldə edə bilməyəcək”.

Baş nazir Tehranın hərbi addımlarını diqqətlə izlədiklərini və yeni bir hücum dalğası olacağı təqdirdə ordunun dərhal hərəkətə keçəcəyini bəyan edib:

“Əgər İran böyük bir səhvə yol verib bizə yenidən hücum edərsə, onlara daha qətiyyətli və amansız şəkildə cavab verəcəyik. İsrailin tam özünümüdafiə hüququ var və biz lazım gəldikdə bu hüquqdan sonuna qədər istifadə edirik”.

Netanyahu çıxışında bazar günündən bəri regional gərginliyin artması fonunda ABŞ Prezidenti Donald Trampla apardığı intensiv telefon danışıqlarına da toxunub. Ağ Evin prosesi dayandırmaq cəhdlərini nəzərə alan İsrail lideri, hücum planlarının müvəqqəti olaraq dondurulduğunu işarə edib.