Braziliyanın Paraiba əyalətində çoxsaylı qətllərdə iştirakı olduğu bildirilən 33 yaşlı Jorlan Alves da Silva saxlanılıb. Polis tərəfindən axtarılan şübhəlinin qadın qiyafəsində gizlənərək qaçmağa çalışdığı bildirilib.

“Qafqazinfo” xəbər verir ki, Silva may ayının sonunda həbsxanadan azadlığa buraxıldıqdan sonra təxminən üç ay ərzində törədilən 16 qətldə iştirak etməkdə şübhəli bilinir.

Polis onun bəzi cinayətlərlə əlaqəsini təsdiqləyən texniki sübutların olduğunu açıqlayıb.

Silva saxlanılarkən qadın paltarı, uzun qara parik, qadın sandaleti və günəş eynəyi taxıb. Dırnaqlarının da boyandığı bildirilib. Polis onun görünüşünü dəyişdirərək şəxsiyyətini gizlətməyə və ərazidən qaçmağa çalışdığını ehtimal edir.

Şübhəli saxlanıldığı zaman təxminən 2 yaşlı uşağı da yanında aparıb. Polis uşağın Silva ilə qohum olmadığını bildirib. Tibbi müayinədən keçirilən uşağın vəziyyətinin yaxşı olduğu qeyd edilib. Onun şübhəli ilə necə bir araya gəldiyi də araşdırılır.

Braziliya mətbuatının məlumatına görə, Silva həbsdən çıxdıqdan sonra üç ay ərzində baş verən 16 qətldə şübhəli bilinir. Cinayətlərin əksəriyyətinin Paraiba əyalətinin Vale do Mamanguape bölgəsində törədildiyi qeyd edilir.

Polis araşdırdığı işlərdən birinin avqustun 1-də Rio Tintoda iki iş adamının öldürülməsi olduğunu açıqlayıb. Məlumata görə, Silva istintaq zamanı qurbanlardan birinin dəfn edildiyi yeri də polisə göstərib.

Dindirmə zamanı Silva həyatında təxminən 80 nəfəri öldürdüyünü deyib. O, ilk qətlini 13 yaşında törətdiyini də bildirib. Lakin polis bu etirafın hələ təsdiqlənmədiyini vurğulayıb. Hüquq-mühafizə orqanları 80 qətl iddiasının hər birini ayrıca araşdırır və şübhəlinin ifadələrini digər sübutlarla yoxlayır.