ABŞ Prezidenti Donald Trampın Kaliforniyaya səfəri öncəsi onun qolf klubunun yaxınlığında silahlı şəxs saxlanılıb.

“Qafqazinfo” xəbər verir ki, Los-Anceles Şəhər Şerif Departamentinin məlumatına görə, hadisə Cənubi Kaliforniyada yerləşən “Trump National Golf Club Los Angeles” yaxınlığında qeydə alınıb.

Federal agentlərin ərazidə şübhəli şəxsin hərəkət etdiyini bildirməsindən sonra polis əməkdaşları müdaxilə edib.

CNN-ə danışan hüquq-mühafizə orqanlarındakı mənbə bildirib ki, ABŞ Məxfi Xidməti saxlanılan şəxsin prezident üçün hər hansı təhlükə yaradıb-yaratmadığını araşdırır. İlkin məlumatlara görə, şəxsin Trampa qarşı hücum hazırladığına dair konkret dəlil aşkarlanmayıb, lakin araşdırma davam edir.

Qeyd edilib ki, Prezidentin “Rancho Palos Verdes”də yerləşən qolf klubunda Respublikaçılar Partiyasının Milli Komitəsinin təşkil etdiyi şam yeməyində iştirak etməsi planlaşdırılır.

Şerif Departamentinin məlumatına görə, saxlanılan şəxsin 38 yaşlı Cenin Con Teyl olduğu müəyyən edilib. Onun əvvəllər soyğunçuluq işi üzrə araşdırıldığı bildirilib.

İstintaqa əsasən, Teyl qolf klubunun ətrafında foto və video çəkib, həmçinin təhlükəsizlik tədbirlərini müşahidə edib. O, gizli odlu silah gəzdirmək və qadağan olunmuş sursat saxlamaq ittihamları ilə həbs olunub.

FTB-nin Birgə Terrorizm İşçi Qrupunda çalışan müstəntiqlər onun evində axtarış aparıb. Axtarış zamanı qanunsuz şəkildə dəyişdirilmiş AR tipli tüfəng, 0,45 kalibrli tapança, zirehli geyim, yüksək tutumlu maqazinlər, sursat, radio rabitə cihazları və bir neçə qeyd dəftəri aşkar edildiyi açıqlanıb.

Rəsmilər bildiriblər ki, FTB, Məxfi Xidmət və yerli hüquq-mühafizə orqanları araşdırmanı davam etdirir. İstintaqın nəticələrindən asılı olaraq əlavə ittihamların irəli sürülə biləcəyi qeyd olunub.