Bu gün Türkmənistanda Azərbaycan Mədəniyyəti Günləri başlayıb.

“Qafqazinfo” xəbər verir ki, iyunun 5-dən 7-dək davam edəcək tədbirlər Azərbaycan və Türkmənistan arasında mədəni-humanitar əməkdaşlığın inkişafına, eləcə də, xalqlar arasında dostluq münasibətlərinin daha da möhkəmlənməsinə xidmət edir.

Azərbaycan Mədəniyyəti Günləri çərçivəsində Türkmənistanın Arkadağ və Aşqabad şəhərlərində müxtəlif konsert proqramları, sərgilər və yaradıcı görüşlər təşkil olunacaq. Tədbirlər vasitəsilə yerli sakinlər Azərbaycanın zəngin mədəni irsi, milli musiqisi, incəsənəti və qədim ənənələri ilə yaxından tanış olmaq imkanı qazanacaqlar.

Proqram çərçivəsində tanınmış incəsənət xadimlərinin iştirakı ilə keçiriləcək tədbirlər Azərbaycan mədəniyyətinin müxtəlif istiqamətlərini əhatə edəcək. Musiqi, rəqs, təsviri sənət və digər yaradıcılıq nümunələri qardaş ölkənin tamaşaçılarına təqdim olunacaq.

Proqramda “Tağıyev. Neft” bədii filmi və “Cənnət yuxusu” bədii-sənədli filminin nümayişi, Xalq şairi Səməd Vurğunun ədəbi-bədii irsinə həsr olunmuş məruzə, eləcə də müxtəlif sərgilərin açılışı nəzərdə tutulub.

Mədəniyyət günlərinin ilk günü axşam saatlarında Azərbaycan incəsənət ustalarının iştirakı ilə qala konserti keçiriləcək.

Tədbirlər Türkmənistanın Aşqabad və Arkadağ şəhərlərində baş tutacaq.

Konsertlər, sərgilər, film nümayişləri və digər mədəni layihələr Azərbaycanla Türkmənistan arasında humanitar və mədəni əlaqələrin daha da inkişafına töhfə verəcək.

Lamiyə Məmmədova