Nifrətin yatan yerini, 

Qəzəbin batan yerini, 

Duaların göy üzündə 

Allaha çatan yerini, 

Gözlə, bilib gələcəyəm...

Çiynindən atma daşımı, 

Dizinə qoyum başımı, 

Bilsəm ki, gözləyənim var, 

Bir daş ilə göz yaşımı, 

Gözlə, silib gələcəyəm..

***

Kağızın üstünə düşüb,

İki əlimin kölgəsi.

Yenə də lap zilə qalxıb

Təkliyin yalquzaq səsi...

Vaxtdan yaxa qurtarmışam,

Bilmirəm saat neçədir.

Ay yarımçıq, ulduzlar yox,

Yaman ölməli gecədir...

Nə varım var, nə barxanam

Ömür yükü bağlamağa.

Allah, məni yarı öldür,

Yarı saxla ağlamağa...

Qağayı, axtar məni, 

Bu yerdən apar məni, 

Ölüm köksümü döyür, 

Qorxuram açar məni…

İçim qara gecədir. 

Səkisiz dar küçədir.

Qağayı, dəniz üstdə 

Söylə, saat neçədir?

***

Sevgilim, mən öləndə, 

Bir küncdə xisin-xısın 

Ağlayacaqsanmı sən? 

Kimin xarabasında 

Bir damla yaşa dönüb 

Düşəcəyəm gözündən? 

Ağla, qurbanım, ağla, 

Ağla, һeyranım, ağla, 

Evdə qonaqlar olsa,

Çıxıb eşikdə ağla. 

Gözlə, gecə düşəndə 

Yorğan-döşəkdə ağla. 

Qulaq asma aləmin 

Sözünə bircə kərə. 

De, Vaqif ölməliydi, 

Gəl öldü naһaq yerə... 

Sevgilim, mən öləndə, 

Soraq sənə gələndə, 

Düşmən gözü güləndə, 

Ağla, olanım, ağla, 

Ağla, qalanım, ağla, 

Ağla, mən ölüm, ağla...

***

Məzarıma 

nə başdaşı qoyun, 

nə heykəl. 

Bir cüt ayaqqabı qoyun, 

ayağıyalın 

geyib getsin...

***

Bu payız da başlandı, 

Bu yağış da... 

Ölülərim, 

Dirilərim dolanır içimdə, 

Xatirələr səyriyir gecəmdə, 

Təkliyimi minib at tək 

Yanır 

sönür 

ötür ömrüm... 

Ekspreslər dayanmayan 

Kiçik stansiyalar tək

***

Doğuldum 1939-da, 

1937-də tutuldum. 

48-də nənəm öldü, 

ömrümdə ilk dəfə ölüyə ağladım. 

Balıqlar saxladım 

akvariumda. 

Açıq qaldı pəncərəm

 bir qış gecəsi. 

Dondu balıqlar... 

İndi 1965-in 

yanvar gecəsidir. 

Deyəsən yaşamaq istəyirəm.

***

Yollar uzun, yollar gödək

Nə fərqi var hansı eldə,

Hansı yolda azasan?

Ellər min-min, dillər min-min,

Nə fərqi var... hansı eldə,

... Hansı dildə susasan?