Yanvarın 13-ü Şabran Rayon İcra Hakimiyyətinin inzibati binasında icra başçısının 2025-ci ilin sosial-iqtisadi inkişafının yekunları və 2026-cı ildə qarşıda duran vəzifələrə həsr olunan hesabat yığıncağı keçirilib.

“Qafqazinfo” xəbər verir ki, yığıncağın əvvəlində qonaqlar və Rayon İcra Hakimiyyətinin başçısı yanında Şuranın üzvləri Ulu Öndər Heydər Əliyevin abidəsini ziyarət ediblər.

Hesabat yığıncağında millət vəkili Mahir Süleymanlı, Prezident Administrasiyasının Ərazi-təşkilat məsələləri şöbəsinin sektor müdiri Habil Əzənmədov, rayonun idarə, müəssisə, təşkilat rəhbərləri  və rayon ictimaiyyəti iştirak edib.

Tədbirdə çıxış edənlər 2025-ci ilin ölkəmizdə, eləcə də Şabran rayonunda bir çox sahələrdə inkişaf ili olduğunu qeyd edib, il ərzində müxtəlif sahələrdə görülmüş işlər, həyata keçirilmiş tədbirlər və 2026-cı ildə qarşıda duran vəzifələr barədə məlumat veriblər.

2025-ci ilin aprel ayında Şabran rayonunun ərazisindən keçən çaylarda sel daşqını nəticəsində rayonda yaşayış evlərinə, təsərrüfatlara, eləcə də infrastruktura dəymiş ciddi ziyanın aradan qaldırılması ilə bağlı müxtəlif qurumların gördüyü işlər barədə məlumat verilib. Müvafiq qurumlar tərəfindən ilkin mərhələdə evinə ciddi ziyan dəymiş 17 rayon vətəndaşı üçün fərdi mənzillərin tikintisinə başlanılıb.

Rayonun təhsil, idman sahəsində istər ölkə ərazisində, istərsə də beynəlxalq səviyyədə əldə olunmuş uğurlardan bəhs edilib və bu uğurların davam etdirilməsi üçün 2026-cı ildə də səylə çalışılacağı bildirilib.