Böyük Britaniya ilə İrlandiya arasında inşa ediləcək 430 milyon funt-sterlinq (təxminən 580 milyon dollar) dəyərində sualtı elektrik kabelinin marşrutu dəyişdirilib.

“Qafqazinfo” xəbər verir ki, buna səbəb “Harry Potter” fanatlarının etirazları olub.

“Greenlink” interkonnektor layihəsi çərçivəsində çəkilməsi planlaşdırılan 125 mil (təxminən 201 kilometr) uzunluğundakı kabel xətti Uelsin cənub-qərbində yerləşən Fresuoter Vest çimərliyindən keçməli idi.

Lakin bu ərazi “Harry Potter” pərəstişkarları üçün xüsusi əhəmiyyət daşıyır. Məhz burada “Harry Potter” film seriyasının son ekranlaşdırmalarından birində Dobbinin ölüm səhnəsi çəkilib. Hadisədən sonra fanatlar çimərlikdə Dobbinin xatirəsinə kiçik bir abidə yaradıblar.

Layihənin ilkin marşrutu açıqlanandan sonra şirkətə minlərlə etiraz mesajı və telefon zəngi daxil olub.

“Etchea Energy” şirkətinin baş direktoru Saymon Ludlam bildirib ki, fanatların reaksiyasından sonra layihə komandası məsələni yenidən nəzərdən keçirib.

Nəticədə kabel xəttinin marşrutu dəyişdirilib və Dobbinin xatirəsinə yaradılmış əraziyə zərər vurulmaması qərara alınıb.

Pembrokşir bölgəsində yerləşən Fresuoter Vest çimərliyi hər il minlərlə “Harry Potter” fanatını qəbul edir. Ziyarətçilər Dobbinin xatirəsinə burada rənglənmiş daşlar, məktublar və müxtəlif əşyalar qoyurlar.

2022-ci ildə “Milli Etimad” təşkilatı ətraf mühitlə bağlı narahatlıqlar səbəbindən turistlərə çimərlikdə corab və digər əşyalar buraxmamağı tövsiyə etmişdi. Bununla belə, Dobbinin xatirə məkanının saxlanmasına icazə verilib.