Almaniyanın Saksoniya torpağında yerləşən Bad-Düben şəhər rəhbərliyi 800 illik tarixə malik Şnaditz su qalasını satışa çıxarıb.

“Qafqazinfo” xəbər verir ki, şəhər mülk üçün simvolik olaraq cəmi 1 avro tələb edir, lakin bu “əlverişli” sövdələşmənin arxasında böyük maliyyə öhdəlikləri dayanır.

1012 kvadratmetrlik yaşayış sahəsi, iki qülləsi, böyük cəngavər zalı və su xəndəyi olan kompleks zamanın dağıntılarına məruz qalıb. Bad-Düben bələdiyyə nümayəndələri binanın damının hələ də su keçirmədiyini bildirsələr də, obyektin tam bərpası və müasir standartlara uyğunlaşdırılması üçün ən azı 20 milyon avro investisiya tələb olunur.

Bundan əlavə, tikili dövlət tərəfindən tarixi abidə kimi qorunduğu üçün aparılacaq hər bir təmir və bərpa işi sərt bürokratik qaydalara tabedir və ciddi nəzarət altında həyata keçirilməlidir.

Şnaditz qalası əsrlər boyu fon Çaşnitz zadəgan ailəsinin iqamətgahı olub və məşhur alman yazıçısı Henrix fon Klaystın “Mixael Kolhaas” əsərində də yer alıb. İkinci Dünya Müharibəsindən sonra müsadirə edilən bina Şərqi Almaniya dövründə bələdiyyə idarəsi, poçt şöbəsi, bərbərxana və uşaq bağçası kimi istifadə edilib. Almaniyanın birləşməsindən sonra isə boş qalıb.

2014-cü ildə amerikalı investorlar qalanı alaraq hotel və restoran kompleksinə çevirmək istəsələr də, maliyyə öhdəlikləri yerinə yetirilmədiyi üçün 2018-ci ildə müqavilə ləğv olunub və bina yenidən şəhər bələdiyyəsinin balansına qaytarılıb. İndi şəhər rəhbərliyi tarixi kompleksi xilas edə biləcək yeni investor axtarışındadır.