Bu gün Bakı Ağır Cinayətlər Məhkəməsində Rabitə Nazirliyinin sabiq aparat rəhbəri Vidadi Zeynalov və digər yüksək vəzifəli şəxslərinin cinayət işi üzrə məhkəmə prosesi davam etdirilib.

“Qafqazinfo”nun prosesdə iştirak edən əməkdaşının verdiyi xəbərə görə, hakim Əfqan Hacıyevin sədrliyi keçirilən prosesdə fasilə elan olunub.

Beytulla Hüseynov vəkillərin suallarını cavablandırıb. B.Hüseynov deyib ki, ittihamda göstərilən mənimsəmə rəqəmləri şişirdilib. Tikinti şirkətlərinə pulun verilməsində Vidadi Zeynalovun hər hansı rolunun olub-olmaması sualına cavab verməyib: "Göstəriş nazirliyin rəhbərliyi tərəfindən verilib. Amma ad çəkməyəcəyəm".

B.Hüseynov istintaqa verdiyi ifadəni təsdiq etdiyini deyib: "Mən hər şeyi danışmışam. Xahiş edirəm, mənə suallar verməyin".

V.Zeynalovun vəkillərinin istəyi ilə B.Hüseynovun ifadəsinin həmin hissəsi elan olunub. B.Hüseynov istintaqa ifadəsində deyib ki, tikinti üçün qiymətlərin şişirdilməsi barədə göstərişi Əli Abbasov versə də, bu işlər barədə hesabat Vidadi Zeynalova verilirdi: "Vidadi Zeynalov hər ayın sonunda mühasib Anar Mustafayevdən hesabat alırdı, bizim onları aldadıb-aldatmadığımızı yoxlayırdı. Hər ay Vidadi Zeynalova müəyyən məbləğdə pul vermişik. Əli Abbasovun göstərişi ilə onun qrup yoldaşı Nadir adlı şəxsə, müavini İltimas Məmmədova və vergi orqanlarına hər ay pul vermişəm, Əli Abbasova yaxın adamların aylıq internet pulunu ödəmişəm".

Bundan sonra təqsirləndirilən Anar Mustafayev ifadə verib. O deyib ki, istintaqa verdiyi ifadədə dediyi rəqəmləri təsdiqləyir: "Amma bəzi yerlərdə dollar-manat məsələsində səhv ediblər. Xarici şirkətlər gəlib bizə deyirdilər ki, müqaviləni bizlə imzalayın, sizə bonus verəcəyik. Bunlar rəsmi qeydə alınmırdı. Beytulla Hüseynova əməliyyatlar üçün 15 min manat verdiyini demişəm. Amma bunu yalandan dedim. Mən adlar çəkə bilmədiyim üçün yalan danışdım. Düzdü, Beytulla müəllimin mənə hər ay 7 min manat verdiyini demişəm, amma onun cəmi 2 min manatı məndə qalırdı, qalanı isə digər işçilərə verilirdi.

Vidadi Zeynalova da vəsait vermədiyimi dedim, çünki istintaqda təxmini rəqəm deməyimi istədilər, mən də iki dəfə paket verdiyimi, amma içində nə qədər pul olduğunu bilmədiyimi dedim. Beytulla müəllim üzləşmədə mənə ayda 2500 manat verdiyini dedi, mən də 2500 yox, 2 min verdiyini deməyə utandım. Çünki 10 il rəhbərim olmuşdu. Tenderlərdə öz adamılarımızı qalib edirdik, biz dövlətin yox, Bayram Vəliyev, Namazali Məmmədov və Emin Məmmədovun haqqına girirdik. Buna da özləri razılıq veriridi. Uşaq deyilsiniz ki, bilirsiz də, kimsə 100 manat investisiya qoyursa, 30-35 manat əlavə qazancı olur. Biz tikinti sahəsində məcburiyyət qarşısında qalıb monopoliya qurmuşduq. 2005-2015-ci illərdə hər ay əmək haqqımdan əlavə 800-2500 manat pul aldığımı da etiraf edirəm. Bu pulları ya özümüz oğurlamalıydıq ya da başqasının oğurlamasına göz yummalıydıq. Qismən də olsa, özümü təqsirli bilirəm".

Prosesdə günün ikinci yarısına kimi fasilə elan olunub.

***

Fasilədən sonra proses davam etdirilib. Anar Mustafayev suallara cavab verib. O deyib ki, B.Hüseynovdan ümumi olaraq maaşdan əlavə təxminən 100 min manat alıb: "Aylıq aldığım 7 min manatdan 5 mini işçilərin müalicəsinə, toylara, yaslara gedirdi".

V.Zeynalovun vəkillərinin "BTRİB-də dövlət qurumlarımın yoxlamalarının nəticələri necə olub" sualına A.Mustafayev "normal olub" deyə cavab verib. Vəkilin təkrar "bəs Beytulla Hüseynov deyirdi ki, 22-24 milyon manat rəhbərliyə vermişik" deməsinə B.Hüseynov "bizə dövlət ittihamçısı lazım deyil, vəkillər dövlət ittihamçısından da betərdilər" deyə etiraz edib.

Digər təqsirləndirilən Bayram Vəliyev məhkəmədə ifadə verməkdən imtina edib. İstintaqa verdiyi ifadəni təsdiq etdiyini deyib. Onun istintaqa ifadəsi elan olunub. O deyib ki, gömrükdə işdən təzə çıxdığı üçün işsiz olduğuna görə Beytulla Hüseynova müraciət edib: “Onun təklifi ilə "Bakı Rabitə Təmir Tikinti” və “Təmir Təchizat Servis” MMC şirkətlərini təsis etdim. Bundan sonra mən rəsmi olaraq rəhbər qalsam da, faktiki olaraq Beytulla Hüseynov rəhbərlik edirdi. Onun tapşırığı ilə bir dəfə şirkətləri Beytulla müəllimin arvadının adlna keçirdim, sonra yenə öz adına qaytardım. O tenderlərdə həmin şirkətlərin qalib olmasını təmin edirdi. Mən Beytulla Hüseynovun əmrlərini yerinə yetirmişəm, 1000 manat maaş, 1500 manat isə paket alırdım. Tender və kotirovka sənədləri ilə məşğul olmurdum, özləri həll edirdi, sadəcə qol çəkirdim".

Vidadi Zeynalov ittiham aktını almadığını deyib, hakim veriləcəyini bildirib.

Məhkəmə prosesi dekabrın 2-də davam etdiriləcək.

Murad Əhməd